काठमाडौँ, असार २५ । अमेरिकाले इरानविरुद्ध पुनः व्यापक सैन्य हवाई आक्रमण सुरु गरेको छ। अमेरिकी सेनाले इरानका दक्षिणी तटीय क्षेत्रमा रहेका विभिन्न सैन्य संरचना र रणनीतिक लक्ष्यलाई निशाना बनाउँदै नयाँ आक्रमण गरेको जनाएको अन्तर्राष्ट्रिय सञ्चारमाध्यमहरूले उल्लेख गरेका छन्।
प्राप्त विवरणअनुसार बन्दर अब्बास, सीरिक, चाबहार, कोनारक, जास्क तथा अबु मुसा द्वीप आसपासका क्षेत्रमा शक्तिशाली विस्फोटका आवाज सुनिएको छ। अमेरिकी सेन्ट्रल कमाण्डले होर्मुज जलडमरूमध्यमा अन्तर्राष्ट्रिय जलमार्गको सुरक्षामा चुनौती उत्पन्न गर्ने इरानी सैन्य क्षमतामाथि लक्षित कारबाही गरिएको जनाएको छ।
अमेरिकाले हालै इरान समर्थित आक्रमणका कारण होर्मुज जलडमरूमध्य हुँदै आवतजावत गर्ने व्यापारिक जहाजहरू असुरक्षित बनेपछि प्रतिकारस्वरूप यो सैन्य अभियान सञ्चालन गरिएको दाबी गरेको छ। अमेरिकी पक्षका अनुसार आक्रमणको उद्देश्य इरानको समुद्री आक्रमण क्षमता कमजोर पार्दै अन्तर्राष्ट्रिय व्यापारिक जहाजहरूको सुरक्षित आवागमन सुनिश्चित गर्नु हो।
यता इरानी सञ्चारमाध्यमहरूले प्रभावित क्षेत्रमा हवाई प्रतिरक्षा प्रणाली सक्रिय पारिएको र धेरै स्थानमा विस्फोट भएको पुष्टि गरेका छन्। यद्यपि आक्रमणबाट भएको क्षति तथा मानवीय हताहतीबारे इरानले विस्तृत आधिकारिक विवरण सार्वजनिक गरिसकेको छैन।
यसअघि युद्धविरामको प्रयास भएको भए पनि पछिल्ला घटनाक्रमसँगै अमेरिका र इरानबीचको तनाव पुनः तीव्र बनेको छ। अमेरिकी राष्ट्रपति डोनाल्ड ट्रम्पले युद्धविराम प्रभावहीन भएको संकेत दिएपछि दुवै देशबीच सैन्य गतिविधि बढेको अन्तर्राष्ट्रिय विश्लेषकहरूले बताएका छन्।
यस घटनापछि मध्यपूर्वको सुरक्षा अवस्था थप जटिल बनेको छ। विशेषगरी विश्वकै महत्वपूर्ण तेल ढुवानी मार्ग मानिने होर्मुज जलडमरूमध्यमा उत्पन्न अस्थिरताले अन्तर्राष्ट्रिय ऊर्जा बजारमा पनि प्रभाव पार्न थालेको छ। कच्चा तेलको मूल्यमा वृद्धि देखिएको छ भने विश्वव्यापी ढुवानी तथा आपूर्ति प्रणालीमा समेत असर पर्ने चिन्ता व्यक्त गरिएको छ।
यसैबीच अन्तर्राष्ट्रिय समुदायले दुवै पक्षलाई संयमता अपनाउँदै वार्तामार्फत समस्या समाधान गर्न आग्रह गरेको छ। संयुक्त राष्ट्रसंघसहित विभिन्न राष्ट्रहरूले क्षेत्रीय युद्ध थप फैलिन नदिन तत्काल कूटनीतिक पहल आवश्यक रहेको बताएका छन्।
Published Date: 09 July 2026
