जर्मनीलाई पेनाल्टी सुटआउटमा हराउँदै पाराग्वे अन्तिम १६ मा प्रवेश

काठमाडौं, असार १६ । चार पटकको विश्व विजेता जर्मनीलाई पेनाल्टी सुटआउटमा स्तब्ध पार्दै दक्षिण अमेरिकी राष्ट्र पाराग्वे फिफा विश्वकप २०२६ को अन्तिम १६ मा प्रवेश गरेको छ।

अमेरिकाको बोस्टन स्टेडियममा मंगलबार बिहान भएको राउन्ड अफ ३२ को निकै नै रोमाञ्चक र तनावपूर्ण खेलमा पाराग्वेले सडनडेथमा जर्मनीलाई ४-३ गोल अन्तरले पराजित गर्दै इतिहास रचेको हो।

विश्वकपको इतिहासमा जर्मनी पेनाल्टी सुटआउटमा पराजित भएको यो नै पहिलो पटक हो, जसले गर्दा यो खेल फुटबल इतिहासकै एउटा ठूलो उलटफेरका रूपमा हेरिएको छ। यस जितसँगै पाराग्वेले सन् २००२ को विश्वकपमा जर्मनीसँग ब्यहोरेको हारको बदला समेत २४ वर्षपछि लिएको छ।

निर्धारित ९० मिनेट र थप गरिएको ३० मिनेटको अतिरिक्त समयको खेल १-१ को बराबरीमा सकिएपछि खेलको निर्णय पेनाल्टी सुटआउटबाट लिइएको हो।

चालु विश्वकपमा पेनाल्टी सुटआउटबाट नतिजा तय भएको यो पहिलो खेलसमेत बन्यो। खेलको ४२ औँ मिनेटमा जुलियो इन्सिस्सोले उत्कृष्ट गोल गर्दै पाराग्वेलाई सुरुवाती अग्रता दिलाएका थिए। तर, दोस्रो हाफमा सम्हालिएर मैदान उत्रिएको जर्मनीका लागि ५४ औँ मिनेटमा काई हाभार्ट्सले बराबरी गोल फर्काए।

अतिरिक्त समयको १०२ औँ मिनेटमा जर्मनीका जोनाथन ताहले बललाई जाली चुमाएका थिए, तर विपक्षी खेलाडीमाथि फल भएको भन्दै भिडियो असिस्टेन्ट रेफ्रीले उक्त गोललाई मान्यता दिएन।

त्यसपछिको पेनाल्टी सुटआउट र सडनडेथमा खेल निकै नाटकीय बन्यो। सुरुवाती पाँच-पाँच पेनाल्टी प्रहारमा दुवै टोलीका गोलकिपरले उत्कृष्ट प्रदर्शन गर्दै दुई-दुईवटा प्रहार बचाएपछि स्कोर ३-३ को बराबरीमा पुगेको थियो।

जर्मनीका लागि कप्तान जोसुअ किम्मिच, जमाल मुसिएला र नादिएम अमिरीले गोल गरे भने काई हाभार्ट्स र निक वाल्टमेडको प्रहारलाई पाराग्वेका गोलकिपर ओर्लान्डो गिलले उत्कृष्ट बचाउ गरिदिए। सडनडेथतर्फ धकेलिएको छैटौँ प्रहारमा जर्मनीका जोनाथन ताहको प्रहार पोस्टभन्दा माथिबाट बाहिरिएपछि जर्मनी दबाबमा आयो।

त्यसको लगत्तै पाराग्वेका जोसे क्यानालेले कुनै गल्ती नगरी निर्णायक पेनाल्टीलाई गोलमा परिणत गर्दै आफ्नो टोलीलाई अविश्वसनीय जित दिलाए। पाराग्वेका लागि माउरिसियो, गोस्ताभो गोमेज र माथियस गालार्जाले पनि पेनाल्टीमा गोल गरेका थिए।

यो पराजयसँगै जर्मनी सन् २०१४ को विश्वकप उपाधि जितेयता नकआउट चरणमा कुनै पनि खेल जित्न नसक्ने आफ्नो खराब लयलाई तोड्न असफल भएको छ। पछिल्ला दुई विश्वकपमा समूह चरणबाटै बाहिरिएको जर्मनी यस पटक १२ वर्षपछि नकआउट चरणमा पुगे पनि पहिलो खेलमै घर फर्कन बाध्य भयो।

जर्मनी जारी विश्वकपबाट बाहिरिने उरुग्वे पछिको दोस्रो पूर्व विजेता राष्ट्र बनेको छ। अर्कातर्फ, पाराग्वेले विश्वकपको इतिहासमा दोस्रो पटक नकआउट चरण पार गर्न सफल भएको छ।

यसअघि सन् २०१० को दक्षिण अफ्रिका विश्वकपमा जापानलाई पेनाल्टी सुटआउटमै हराएर क्वाटरफाइनल पुगेको पाराग्वेले यस पटक पूर्व विजेता जर्मनीलाई पाखा लगाउँदै ऐतिहासिक यात्रा तय गरेको छ। अब पाराग्वेले अन्तिम १६ को खेलमा फ्रान्स र स्वीडेनबीचको विजेतासँग प्रतिस्पर्धा गर्नेछ।