काठमाडौं, असार १० । राष्ट्रिय स्वतन्त्र पार्टी (रास्वपा) को सभापतिमा रवि लामिछाने निर्विरोध निर्वाचित भएका छन्। चितवनमा जारी प्रथम महाधिवेशनमा सभापति पदका लागि लामिछानेको मात्र उम्मेदवारी परेपछि उनी निर्विरोध निर्वाचित भएको घोषणा गरिएको रास्वपा केन्द्रीय निर्वाचन आयोग प्रमुख भुवन केसीले जानकारी दिए।
उनका अनुसार हाल केन्द्रीय समिति सदस्य पदका लागि उम्मेदवारी दर्ता प्रक्रिया जारी रहेको छ। उम्मेदवारी दर्ता आज राति १२ बजेसम्म खुला रहनेछ भने भोलि बिहान ८ बजेदेखि मतदान सुरु हुनेछ। चार हजार ५०० भन्दा बढी मतदाताले मतदान गर्ने अनुमान गरिएको छ, जसका लागि करिब आठ घण्टा समय लाग्ने बताइएको छ।
Published Date: 24 June 2026
