भक्तपुर, चैत २३ । भक्तपुर जिल्लाका विभिन्न स्थानबाट प्रहरीले ठूलो परिमाणमा लागूऔषधसहित चार जनालाई पक्राउ गरेको छ। जिल्ला प्रहरी परिसर भक्तपुर र प्रहरी वृत्त ठिमीबाट खटिएको संयुक्त टोलीले चैत २२ र २३ गते विशेष सूचनाको आधारमा उनीहरूलाई नियन्त्रणमा लिएको हो।
पक्राउ पर्नेमा भक्तपुर नगरपालिका–१ सल्लाघारी बस्ने ३६ वर्षीय राजु पोतामाहा, भारत मोतीहारी घर भई हाल दुवाकोट बस्दै आएका २४ वर्षीय सोमराती हुसेन, सर्लाही हरिवन घर भई हाल काठमाडौं नरेफाँट बस्ने २९ वर्षीय अजित कार्की र काभ्रेपलाञ्चोक मण्डनदेउपुर–७ घर भई हाल मध्यपुरठिमी–७ नगदेश बस्ने ७५ वर्षीय हर्षबहादुर तामाङ रहेका छन्।
प्रहरीका अनुसार उनीहरूको साथबाट ४ केजी ५२५ ग्राम ‘पोल्याण्ड’ नामक लागूऔषध, १३ केजी ६८० ग्राम गाँजा, ३५ लिटर घरेलु मदिरा, ट्रामाडोल हाइड्रोक्लोराइडका १२० क्याप्सुल र नाइट्राभेट १० पिस बरामद गरिएको छ।
घटनाबारे थप अनुसन्धान भइरहेको जिल्ला प्रहरी परिसर भक्तपुरले जनाएको छ।
