काठमाडौँ, चैत ८ । फेब्रुअरी महिनामा अष्ट्रेलियाको बेरोजगारी दर बढेर ४.३ प्रतिशत पुगेको छ ।अर्थशास्त्रीहरू स्थिर रहने अपेक्षा गरे पनि बेरोजगारी बढेको हो।
अष्ट्रेलियन ब्युरो अफ स्ट्याटिस्टिक्सले सार्वजनिक गरेको विवरणअनुसार जनवरीमा ४.१ प्रतिशत रहेको आधिकारिक बेरोजगारी दर फेब्रुअरीमा बढेर ४.३ प्रतिशत पुगेको हो । जनवरी र फेब्रुअरीको बीचमा रोजगारी प्राप्त अष्ट्रेलियालीहरूको संख्या ४८ हजार ९ सयले बढेको छ ।
यद्यपि, सोही अवधिमा बेरोजगार अष्ट्रेलियालीहरूको संख्यामा ३५ हजार (अर्थात ५.६ प्रतिशत) ले वृद्धि भएका कारण रोजगारीको त्यो वृद्धिलाई यसले असनतुलित बनाएको हो । अष्ट्रेलियन ब्रोडकास्टिङ कर्पोरेशन र अष्ट्रेलियन एसोसिएटेड प्रेसले जानकारी दिएअनुसार अर्थशास्त्रीहरूले फेब्रुअरीमा बेरोजगारी दर ४.१ प्रतिशत मै स्थिर रहने अपेक्षा गरेका थिए ।
रोजगारीमा देखिएको यो वृद्धि मुख्यतया आंशिक समयको रोजगारीका कारण भएको हो । जसमा ७९ हजार ४ सयले वृद्धि भयो । अर्कोतर्फ, पूर्णकालीन रोजगारीमा रहेका मानिसहरूको संख्या भने ३० हजार ५ सयले घटेको छ ।
यसको फलस्वरूप, अष्ट्रेलियालीहरूले काम गरेको कुल घण्टा जनवरीको तुलनामा फेब्रुअरीमा ०.२ प्रतिशतले कम रहन गयो । रोजगारीमा रहेका वा सक्रिय रूपमा काम खोजिरहेका उमेर समूहको जनसंख्या श्रम सहभागिता दर अनुपात ६६.७ प्रतिशतबाट बढेर ६६.९ प्रतिशत पुगेको छ ।
Published Date: 22 March 2026
