भक्तपुर, फागुन २१ । प्रतिनिधिसभा निर्वाचन २०८२ अन्तर्गत भक्तपुर जिल्लाका विभिन्न मतदान केन्द्रहरूमा शान्तिपूर्ण रूपमा मतदान भइरहेको छ। बिहानदेखि नै मतदाताको उत्साहजनक सहभागिता देखिएको छ भने सुरक्षा व्यवस्था कडा पारिएको छ।
भक्तपुर नगरपालिका, चाँगुनारायण नगरपालिका, सूर्यविनायक नगरपालिका तथा मध्यपुर थिमि नगरपालिकाका मतदान केन्द्रहरूमा मतदाताहरू लामबद्ध भएर मतदान गरिरहेका छन्। वृद्धवृद्धा, युवा तथा पहिलो पटक मतदान गर्न आएका मतदाताहरूमा विशेष उत्साह देखिएको छ।
मतदान केन्द्रहरूमा सुरक्षाकर्मी, कर्मचारी तथा स्वयंसेवकहरू परिचालित छन्। कतिपय केन्द्रमा बिहान केहीबेर लाइन लागे पनि समग्रमा मतदान प्रक्रिया व्यवस्थित र शान्तिपूर्ण रूपमा अघि बढिरहेको निर्वाचन अधिकृतहरूले जनाएका छन्।
यसैबीच, केही स्थानमा मतदाता परिचयपत्र रुजू गर्ने प्रक्रियाका कारण सामान्य ढिलाइ भए पनि कुनै अप्रिय घटना नभएको जनाइएको छ।
(फोटो फिचर: भक्तपुरका विभिन्न मतदान केन्द्रमा मतदान गर्दै मतदाता, लामबद्ध दृश्य, सुरक्षाकर्मीको उपस्थिति र मतदान केन्द्र बाहिरको वातावरण)
