काठमाडौँ, असोज २ । श्रीलंकामा जारी साफ यू–१७ च्याम्पियनसिपमा आज नेपाल र दुई पटकको विजेता बंगलादेशको सामना गर्दैछ।
कोलम्बोस्थित रेसकोर्स ग्राउण्डमा खेल नेपाली समयअनुसार साँझ ७:१५ बजे सुरु हुनेछ। नेपालले घरेलु टोली श्रीलंकामाथि २-० को जित निकाल्दै प्रतियोगितामा विजयी सुरुवात गरिसकेको छ।
त्यसमा दुबै गोल समिर कुमारले गरेका थिए । त्यो जितसँगै नेपालको सेमिफाइनल सम्भावना बलियो बनेको छ।
नेपाल च्याम्पियनसिपमा दोस्रो र बंगलादेश पहिलो खेल खेल्दैछ । आजको खेल जितेमा नेपाल समूह ए को विजेताका रुपमा सेमिफाइनलमा पुग्नेछ। जहाँ भारत वा पाकिस्तान मध्ये एक टोलीको सामना गर्नुपर्ने हुनसक्छ।
दुई पटकको च्याम्पियन रहिसकेका बंगलादेश जितेका साथ च्याम्पियनसिपको सुरुवात गर्ने लक्ष्यमा हुनेछ। समूह ‘ए’ मा नेपाल, श्रीलंका र बंगलादेश छन्। शीर्ष दुई टोली सेमिफाइनल पुग्ने भएकाले आजको नतिजाले समीकरणमा प्रभाव पार्नेछ।
अर्को समूह ‘बी’ मा भारत र पाकिस्तानले आ–आफ्नो पहिलो खेल जितिसकेका छन्। त्यो समूहमा माल्दिभ्स र भुटान पनि छन्।
भारत च्याम्पियनसिपको सर्वाधिक सफल टोली (६ पटकको च्याम्पियन) हो भने बंगलादेशले २ र पाकिस्तानले १ पटक उपाधि जितेका छन्। नेपाल भने चार पटक फाइनल खेल्दा पनि उपाधि उचाल्न सकेको छैन।
Published Date: 18 September 2025
