पाकिस्तान, साउन १ । पाकिस्तानको पन्जाब प्रान्तमा मुसलधारे वर्षा हुँदा विगत २४ घण्टामा कम्तीमा ६३ जनाको मृत्यु भएको अधिकारीहरूले बताएका छन्। त्यहाँ बुधवार बिहानदेखि सुरु ठूलो पानी पर्न थालेको थियो।
पाकिस्तानको राष्ट्रिय विपद् व्यवस्थापन प्राधिकरणका अनुसार अधिकांश व्यक्तिको ज्यान घर भत्किएर गएको हो। केही मानिस पानीमा डुबेर र करेन्ट लागेर मरेका हुन्।
राजधानी इस्लामाबादनजिकै रहेको अर्को ठूलो सहर रावलपिन्डीमा मानिसहरूलाई घरमै बस्न दिन बिहीवार सार्वजनिक बिदा दिइएको छ। बाढी आएका नदीको छेउछाउ बस्ने मानिसहरूलाई सुरक्षित स्थानमा जान भनिएको छ।
गत जुन महिनामा मनसुन सुरु भएपछि पाकिस्तानमा वर्षाका कारण झन्डै १८० जनाको मृत्यु भइसकेको छ। तीमध्ये आधाभन्दा बढी बालबालिका छन्।
Published Date: 17 July 2025
