काठमाडौं, असार ५ । स्कटल्याण्डमा जारी त्रिदेशीय टि ट्वान्टी आई सिरिजमा आज नेदरल्याण्ड्सले नेपालको सामना गर्दैछ ।
स्कटल्याण्डको ग्लासगोमा हुने आफ्नो तेस्रो खेलमा नेपाली समय अनुसार बिहीबार बेलुका ७ः४५ बाट दुईबीचको खेल सुरु हुनेछ । सिरिजको अन्तिम खेल खेल्दै गरेको नेदरल्याण्ड्स ४ अंकका साथ तालिको शीर्ष स्थानमा छ । यसअघिका २ मध्ये १ मा जित र १ मा हार बेहोरेको नेपाल २ अंकका साथ तेस्रो स्थानमा छ ।
गत सोमबार भएको सिरिजको पहिलो भेटमा नेदरल्याण्ड्सले नेपालमाथि रोमाञ्चक जित हासिल गरेको थियो । नेपाल र नेदरल्याण्ड्सबीचको उक्त खेलको नतिजा ३ वटा सुपर ओभर पछि आएको थियो ।
नेपालले सिरिजको अन्तिम खेलमा शुक्रबार स्कटल्याण्डको सामना गर्नेछ । तिन टोली सहभागी सिरिज डबल राउण्ड रोबिन लिगको आधारमा जारी छ । र, लिगको शीर्ष स्थानमा रहने टोली विजयी हुनेछ ।
