काठमाडौँ, जेठ ४ । च्याम्पियन पेरिस सेन्ट-जर्मेन (पिएसजी ) ले जितेका साथ लिग वान सिजनको अन्त्य गरेको छ। पिएसजीले शनिवार ओसेरमाथि ३-१ को पुनरागमन जित निकालेको हो।
अप्रिल ५ मा आङ्जेरलाई हराएर ६ खेल बाँकी छँदै पिएसजीले लगातार चौथो लिग १ उपाधि जितेका थियो। ३० औं मिनेटमा लासिन सिनेयोकोले गोल गर्दै ओसेरलाई अप्रत्याशित अग्रता दिलाए।
पिएसजीले दोस्रो हाफको ८ मिनेटभित्र दुई गोल गर्दै सिजनको २६औं लिग खेल जित्यो ।
ख्विचा ख्वारात्स्खेलियाले ५९ औं मिनेटमा बराबरी गोल गरे । त्यसपछि मार्किन्होसले ६७ औं मिनेटमा हेडमार्फत गोल गर्दै घरेलु टोलीलाई अग्रता दिलाए।
गोनकालो रामोसले पेनाल्टीमार्फत अग्रता बढाउने अवसर गुमाए । तर ख्वारात्स्खेलियाले ८८औं मिनेटमा गोल गर्दै ३-१ को जित निश्चित गरे।
लुइस एनरिकको टोली आउने १४ दिनभित्र दुई फाइनल खेल्दै थप उपाधि जित्ने प्रयासमा छ। पिएसजीले ले मे २४ मा रेम्ससँग फ्रेन्च कप फाइनल खेल्नेछ । त्यस्तै मे ३१ मा च्याम्पियन्स लिग फाइनलमा इन्टर मिलानसँग भिड्नेछ।
पिएसजीले यसअघि जनवरीमा मोनाकोलाई हराएर फ्रेन्च सुपर कप पनि जितेको थियो । जसले गर्दा सिजनको अन्त्यमा चार उपाधिसम्म जित्ने सम्भावना छ।
पिएसजी जुनमा हुने नयाँ स्वरूपको फिफा क्लब विश्वकपमा पनि सहभागी हुने तयारीमा छ।
Published Date: 18 May 2025
