सिन्धुपाल्चोक, मंसिर १ । सिन्धुपाल्चोकको मेलम्ची नगरपालिका-२ स्थित भोटेचौर चिया बगान काठमाडौंबाट एकदमै नजिक रहेको एक अत्यन्तै रमणीय र दृश्यात्मक पर्यटकीय गन्तव्य हो। यो काठमाडौंबाट लगभग ४० किलोमिटरको दूरीमा अवस्थित छ।
यहाँको मुख्य आकर्षण भनेको जैसीगाउँको एभरेस्ट चिया बगान हो। जैसीगाउँ पूर्वको भोटेचौर गाउँ विकास समितिको अहिलेको मेलम्ची नगरपालिका वडा नं. २ मा पर्दछ।
भोटेचौरलाई सानो इलामको रूपमा पनि चिनिन्छ। यहाँका केही स्थानहरू उच्च उचाइमा स्थित छन्, जहाँबाट जुगल र लाङटाङ जस्ता हिमालयका सुन्दर पर्वतहरूको दृश्य देख्न सकिन्छ। चिया बगानसँगै यहाँ विभिन्न प्रकारका जैविक फार्महरू सञ्चालनमा छन्, जहाँ जैविक ट्राउट माछा, विभिन्न प्रकारका तरकारीहरू र जैविक चिया आदि उत्पादन हुन्छ।
भोटेचौर अहिले घरेलु पर्यटनको केन्द्रको रूपमा विकास हुँदैछ। भोटेचौर वरिपरिका क्षेत्रहरू पनि पर्यटकहरू माझ लोकप्रिय छन्। यहाँ शनिबार र विदाका दिन पर्यटकको घुइँचो लाग्ने गर्दछ ।
