काठमाडौं, कार्तिक ३ । साउदी प्रो लिगमा अल– नासरले रोमाञ्चक जित हात पारेको छ । अल–शबाबको घरेलु मैदानमा भएको खेलमा अल–नासरले अल– शबाबमाथि २–१ गोलअन्तरको रोमाञ्चक जित निकालेको हो । अल–नासरको जितमा कप्तान क्रिष्टियानो रोनाल्डो र एमरिक लोपोर्टेले गोल गरे ।
अल शबाबले भने आत्मघाती गोल उपहार पाएको थियो । अल–नासरका अलि अलहासनले आत्मघाती गोल गरेका थिए । खेलमा सुरुवाती अग्रता अल–नासरले नै लिएको थियो । खेलको ६९औं मिनेटमा एमरिक लोपोर्टेले गोल गर्दै अल–नासरलाई सुरुवाती अग्रता दिलाएका थिए ।
तर, खेलको ९०औं मिनेटमा अल–नासरका अलि अलहासनले आत्मघाती गोल गरेपछि अल–शबाब खेलमा फर्किएको थियो । खेलको इन्जुरी समयको सातौँ मिनेटमा अल–नासरले पेनाल्टी पायो । त्यसमा कप्तान क्रिष्टियानो रोनाल्डो चुकेनन् । जितसँगै अल–नासर ७ खेलबाट १७ अंकका साथ लिगको दोस्रो स्थानमा उक्लिएको छ ।
