भक्तपुर, भदौ १६ । उपत्यकामा गर्मी बढेसँगै गर्मी छल्न नजिकैका खोला, झरनालगायतका पानीका मुहान धाउनेहरु बढेका छन् । भक्तपुर चाँगुनारायण नगरपालिकास्थित मुहान पोखरीको झरनामा पनि हिजोआज गर्मी छल्न जाने युवायुवतीहरु प्रशस्त भेटिन्छन् ।
गर्मी बढेसँगै झरनामा नुहाउन आउनेको संख्या बढेको छ । उपत्यकाबाट नजिक भएकाले सार्वजनिक बिदाका दिनमा मुहान पोखरी आउने सर्वसाधारणको भिड लाग्ने गर्छ ।
भक्तपुरको चाँगुनारायण नगरपालिकाको वार्ड नं ६ र ७ मा मुहान पोखरी झरना पर्दछ । यो झरना गर्मी छल्ने उत्कृष्ट गन्तव्य हुन सक्छ । यो झरनाले विदाका दिनलाई निकै रमाइलो बनाउने पक्का छ ।
भक्तपुर चाँगुनारायणमा रहेको यो मुहान पोखरीमा जानका लागि भक्तपुरबाट खरिपाटी हुँदै जान सकिन्छ । खरिपाटीबाट १५–२० मिनेटको बाटो काटेपछि उक्त झरनामा पुग्न सकिन्छ । अहिले धेरै मानिसहरु यो गन्तव्यमा पुग्ने र रमाउने गरेका छन् ।
नगरकोटको महादेव कुण्डबाट बगेर आउने खोला मुहान पोखरीमा आएपछि झरना बन्दछ । त्यो झरना बग्दै आएर हनुमन्ते खोला हुँदै बागमती नदीमा मिसिने गर्दछ ।
