काठमाडौँ, भदौ ८ । सुनकोशी नदीमा आज (शनिबार) साँझ यात्रुसहित खसेको गाडीको खोजी जारी छ । खोटाङको हलेसीबाट काठमाडौँ आउँदै गरेको हाइलक्स गाडी आज साँझ सुनकोसी नदीमा खसेको हो । सिन्धुली गोलान्जोर गाउँपालिका–१ कुडुलेमा भक्तपुरका लागि आउँदै गरेको हाइलक्स साँझ पख सुनकोशी नदीमा खसेको हो ।
हाइलक्समा चार जना सवार रहेको पाइएको छ । सवार चारमध्ये तीन जनासहित हाइलक्स पनि बेपत्ता भएको प्रहरीले जनाएको छ । एक जनाले भने गाडीबाट हामफालेर ज्यान जोगाएको प्रहरीले जनाएको छ । उनीहरू सबै भक्तपुरको सूर्यविनायक नगरपालिका जगातीका रहेको प्रहरीले जानकारी दिएको छ ।
सूर्यविनायक नगरपालिका जगातीका ३२ वर्षीय अबिन बाके, ३० वर्षीय प्रनित स्यागु र ३७ वर्षीय बलराम घटुवा नदीमा बेपत्ता छन् । २७ वर्षीय सुशान्त कक्षपतिले भने ज्यान जोगाएका छन् । उनी अहिले प्रहरीको सम्पर्कमा रहेको र अवस्था सामान्य रहेको बताइएको छ । घटनास्थलमा गोताखोरसहित प्रहरीको टोलीले खोजी जारी राखेको छ ।
