काठमाडौँ, भदौ ३ । फिल्म ‘कङ्गारु’मा नायिका स्वस्तिमा खड्का अनुबन्धित भएकी छिन् । स्वस्तिमासँग निर्माणपक्षले कागजी संझौता गरेको हो । सम्राट बस्नेतको निर्देशनमा बन्न लागेको यो फिल्ममा कलाकारहरू केदार घिमिरे, जितु नेपाल र अर्पण थापा फाइनल भइसकेका छन् ।
राजिभ गुरुङको प्रस्तुतिमा तयार हुन लागेको यो फिल्ममा स्वस्तिमाको प्रवेश भएपछि यसको टिमअप पनि बलियो बनेको छ ।
सस्पेन्स, थ्रीलर र कमेडी जनरामा निर्माण हुन लागेको यो फिल्मको छायांकन ३५ दिनसम्म गरिनेछ । फिल्मको छायांकन अष्ट्रेलियाको विभिन्न शहरमा हुने निर्माणपक्षले बताएको छ ।
निर्देशक बस्नेतले यसपटक फरक कथा भन्ने तयारी गरेकै कारण स्क्रिप्टमा दुई बर्ष लागेको बताए । फुलमुन मोसन पिक्चर्स र उत्तरगया म्युजिक एन्ड फिल्मसँग एसजिटी प्रोडक्शन प्रा.लिको सहकार्यमा यो फिल्म निर्माण हुन लागेको हो ।
फिल्ममा प्रेम थापा, धन बहादुर गुरुङ, मनोज भण्डारीको लगानी रहनेछ । अन्जना दुरा र लक्ष्मी राई सह–निर्माता रहेको फिल्मका कार्यकारी निर्माता टिका भण्डारी हुन् । फिल्ममा सीमा गुरुङको कथा, सुशन प्रजापतिको छायांकन रहनेछ ।
Published Date: 19 August 2024
