सुर्खेत, साउन २१ । कर्णाली प्रदेशका मुख्यमन्त्री यामलाल कँडेलले विश्वासको मत प्राप्त गरेका छन् । माओवादी केन्द्रले साउन ७ गते सरकारलाई दिएको समर्थन फिर्ता लिएपछि मुख्यमन्त्री कँडेलले दोस्रो पटक विश्वासको मत लिएका हुन् ।
मुख्यमन्त्री कँडेललाई कांग्रेस, एमाले र राप्रपा सांसदले मत दिएका छन् । ४० सदस्यीय प्रदेशसभामा सोमबार संसदमा ३७ जनाले मतदान गरेका थिए । मुख्यमन्त्री कँडेलले २३ मत प्राप्त गरे भने विपक्षमा १४ मत रह्यो । कर्णाली प्रदेशसभामा पाँच राजनीतिक दलको प्रतिनिधित्व छ । प्रदेशसभाको सबैभन्दा ठूलो दल कांग्रेसका १५ सांसद छन् भने प्रमुख प्रतिपक्षीमा रहेको माओवादी केन्द्रका १३ सांसद छन् । सरकारको नेतृत्व गरिरहेको एमालेसँग १० सांसद छन् भने एकीकृत समाजवादी र राप्रपाका एक–एक सांसदको प्रतिनिधित्व कर्णाली प्रदेशसभामा छ ।
केन्द्रमा दुई ठूला राजनीतिक दल नेपाली कांग्रेस र नेकपा एमालेबीच असार १७ गते मध्यराति भएको सहमति अनुसार कर्णाली प्रदेश सरकारको नेतृत्व एमालेले गरिरहेको छ । एमाले नेतृत्वको सरकारमा आइतबार चार मन्त्रालयसहित कांग्रेस सहभागी भएको थियो ।
कर्णालीका मुख्यमन्त्री यामलाल कँडेलले कर्णालीको विकास मोडेल बदल्नु आवश्यक रहेको बताएका छन् । सोमबार प्रदेशसभामा विश्वासको मत लिने क्रममा मुख्यमन्त्री कँडेलले कर्णालीमा समयमा काम नहुने परिपाटी रहेको भन्दै त्यसलाई बदल्नुपर्ने बताएका हुन् । ‘कर्णालीमा विकास निर्माणको गति सुस्त छ । जहिल्यै भइरहेकोझैं हुने तर कहिले नसकिने,’ उनले भने, ‘यस्तो अवस्था बदल्नु पर्नेछ ।’
