काठमाडौं, असार २२ । क्यानडाले पहिलो पटक कोपा अमेरिका फुटबलको सेमिफाइनलमा स्थान बनाएको छ । आज (शनिबार) बिहान भएको खेलमा क्यानडाले भेनेजुएलालाई सडन डेथमा ४–३ गोल अन्तरले हराउँदै अर्जेन्टिनासँगको भेट पक्का गर्यो ।
निर्धारित ९० मिनेट १-१ को बराबरीमा सकिएपछि भएको टाइब्रेकरमा ३-३ मा सकिएपछि क्यानडाले सडन डेथमा जित हासिल गरेको हो । अब क्यानडाले सेमिफाइनलमा अर्जेन्टिनाको सामना गर्नेछ ।
अमेरिकाको डालासस्थित एटि एन्ड टि रंगशालामा क्यानडाले १३ औं मिनेटमा जेकब साफलबर्गले गोल गरे । जोनाथन डेविडको कटब्याकमा उनले गोल गरेका थिए । दोस्रो हाफमा सलोमन रन्डनले लामो दुरीबाट गोल गर्दै खेल बराबरीमा ल्याए ।
टाइब्रेकरमा क्यानडा र भेनेजुएला दुवैले दोस्रो र चौथो प्रहारमा गोल गर्न सकेनन् । तर सडन डेथमा विलकर एन्जलको पेनाल्टी असफल भएपछि इस्माएल कोनेले गोल गर्दै जित पक्का गरे ।
शनिबार हुने क्वाटरफाइनलमा उरुग्वे र ब्राजिल तथा कोल्मोबिया र पानामा खेल्नेछन् ।
Published Date: 06 July 2024
