काठमाडौँ, असार ५ । काठमाडाैं उपत्यकामा मेलम्चीकाे खानेपानी तत्काल बन्द नहुने भएकाे छ । शुक्रबारदेखि मेलम्चीको पानी बन्द हुने समाचारहरु बाहिरिएपनि पानीको बहाव र जोखिमलाई ध्यानमा राखेर मेलम्ची खानेपानी सप्लाई भइरहेको मेलम्ची खानेपानी विकास समितिले स्पष्ट पारेकाे छ ।
खडेरीका समयमा काठमाडौंमा पानीको आपूर्तीलाई सहज बनाउन एक घण्टा पानी छोड्दा पनि एक हजार ट्याङ्कलाई पुग्ने पानी जम्मा हुने समितिकाे भनाइ छ । जसकारण तत्काल मेलम्चीको मूलद्वार बन्द नहुने भएकाे हाे ।
बर्खायामलाई मध्यनजर गर्दै मेलम्ची मुहानमा हाइअलर्ट रुपमा कर्मचारी खटाएर काठमाडौंमा पानी सप्लाई भइरहेको समितिले जानकारी दिएकाे छ । मेलम्ची खानेपानी आयोजनाका कार्यकारी निर्देशक रत्न लामिछानेका अनुसार पानीको बहाव र जोखिमलाई ध्यानमा राखेर पानी सप्लाई भइरहेको हाे ।
मनसुन अवधिमा विपत्तिको जोखिम बढ्ने भन्दै २४ घण्टा नै कर्मचारी हाइअलर्टमा खटाइएको पनि लामिछानेले बताएका छन् । यद्धपी पानीको बहाव बढ्नासाथै जुनसुकै बेला पनि मूलद्धारलाई बन्द गरिन सक्ने उनले खुलाए ।
यसअघि पनि मनसुनजन्य विपत्तिबाट मेलम्ची खानेपानी आयोजनाको हेर्डबक्समा हुन सक्ने सम्भावित क्षति न्यूनीकरणका लागि पनि बर्षायाम सुरु भएपछि सरकारले आयोजना बन्द गर्ने गरेकाे थियाे । त्यसपछि वर्षा सकिए लगत्तै खोल्ने गरेकाे थियाे ।
हाल दैनिक २० करोड लिटर हाराहारीमा उपत्यकावासीलाई पानी वितरण भइरहेको छ । यद्धपी पहिले, दैनिक १७ करोड लिटर पानी वितरण गरिने भनिएकाे थियाे ।
सरकारले गत ३१ जेठ गते आयोजना बन्द गर्ने निर्णय गरेको थियो । साे समयमा नेपालका मनसुन भित्रिए पनि पूर्वी भू-भागमा मात्रै सक्रिय भए पनि वागमतीमा ठूलो पानी नपरेपछि तत्कालका लागि आयोजना बन्द गर्न आवश्यक नरहेको भन्दै खुला राखिएको थियो ।
