काठमाडौं, जेठ २४ । अहिले देशका अधिकांश भूभागमा आशिंक बदली रही कोशी, लुम्बिनी, गण्डकी र बागमती प्रदेशमा हल्का वर्षा भइरहेको छ। दिउँसो पनि यी प्रदेशमा मेघगर्जन चट्याङसहित हल्कादेखि मध्यमसम्म वर्षाको सम्भावना रहेको मौसम पूर्वानुमान महाशाखाले जनाएको छ।
दिउँसो काठमाडौं उपत्यकाका केही स्थानमा पनि मेघगर्जन चट्याङसहित हल्कादेखि मध्यम वर्षाको सम्भावना रहेको महाशाखाकी मौसमविद् शान्ति कँडेलले जानकारी दिइन्। कर्णाली, गण्डकी र सुदूरपश्चिम प्रदेशमा हुरीबतासको सम्भावना रहेको महाशाखाले जनाएको छ।
बदलीको मात्रा कायमै हुने हुँदा आज पश्चिम तराईका भूभागमा ४० डिग्री सेल्सियसभन्दा माथि तापक्रम नपुग्ने अनुमान गरेको मौसमविद् कँडेलले जानकारी दिइन्। उनका अनुसार बुधबार काठमाडौंको अधिकतम तापक्रम ३०.७ डिग्री सेल्सियस मापन भएको थियो। बिहीबारको तापक्रम पनि यही हाराहारीमै पुग्नेअनुमान गरेको मौसमविद् कँडेलले बताइन्।
Published Date: 06 June 2024
