काठमाडौं, जेठ १८ । दीपकराज गिरि तथा दीपाश्री निरौलाको समुहले बिहीवारदेखि नयाँ फिल्म ‘छक्का पञ्जा-५’ को छायांकन प्रारम्भ गरेका छन् ।
फिल्मका मुख्य अभिनेता तथा निर्माता गिरीले बिहीवार सामाजिक सञ्जालमा नयाँ पोस्टर शेयर गर्दै आजदेखि छायांकनमा गएको आफ्नो फिल्म यही वर्षको दशैँमा प्रदर्शनमा आउने जानकारी दिएका छन् ।
जस अनुसार यो फिल्म आगामी असोज २४ गते अर्थात फूलपातिका दिनदेखि प्रदर्शनमा आउने छ । सार्वजनिक पोस्टरमा देखिए अनुसार फिल्ममा गिरीसँगै अभिनेत्री वर्षा सिवाकोटी तथा अभिनेता केदार घिमिरे मुख्य भूमिकामा देखिने छन् ।
पोस्टरमा दीपक र वर्षालाई जोडीको रुपमा प्रस्तुत गरिएको छ । राजा गेटअपमा प्रस्तुत भएका दीपकले वर्षालाई रानी बनाएको देखिन्छ । उनीहरूसँगै माग्ने बुढा सेवकको रूपमा उभिएका छन् ।
दीपाश्री निरौलाले निर्देशन गर्ने यो फिल्मले नेपालको अर्थ-सामाजिक आयामलाई व्यंग्य गर्ने निर्माता तथा अभिनेता गिरीको भनाइ छ । फिल्मको छायांकन काभ्रेको पाँचखाल क्षेत्र, पनौति, पोखरा आसपासमा ४५ दिनको सेड्युलमा सम्पन्न गरिने छ ।
आमा सरस्वती मूभिज र आइएमईको प्रस्तुतिमा बन्न लागेको यो फिल्मका अन्य कलाकारहरुलाई भने सार्वजनिक गरिएको छैन ।
Published Date: 31 May 2024
