नेपालमा प्रतिव्यक्ति आय दर निरन्तर घट्दै

काठमाडौं, जेठ १३ । नेपालको प्रतिव्यक्ति आय पछिल्ला आर्थिक वर्षहरूमा निरन्तर घट्दै गएको पाइएको छ । खासगरी कोरोना महामारी र त्यसले अर्थतन्त्रमा असर पारेयता प्रतिव्यक्ति आयमा समेत नकारात्मक प्रभाव परेको पाइएको छ ।

अर्थ मन्त्रालयले आइतबार सार्वजनिक गरेको आर्थिक सर्वेक्षण अनुसार अहिले नेपालको प्रतिव्यक्ति आय वार्षिक १ हजार ४३४ डलर रहेको छ ।
गत आर्थिक वर्षको तुलनामा यस वर्ष ५.७ प्रतिशले मात्र प्रतिव्यक्ति कुल गार्हस्थ उत्पादन बढेको हो । तर, पछिल्लो १० वर्षको तथ्यांक हेर्दा भने प्रतिव्यक्ति आय औसतः ९.१ प्रतिशतका दरले बढेको थियो ।

पछिल्लो १० वर्षको तथ्यांक हेर्दा आव २०७३/७४ मा सबैभन्दा धेरै १६.९ प्रतिशतको वृद्धिदर रहेको थियो । सबैभन्दा कम भने आव २०७६/७७ मा थियो । सो वर्ष ऋणात्मक वृद्धिदर भई ०.१ प्रतिशतमा झरेको थियो । त्यसपछिको वर्ष १०.९ प्रतिशत र आव २०७८/७९ मा १३.३ प्रतिशतले बढेको भए पनि पछिल्लो दुई आर्थिक वर्षमा भने औसतभन्दा वृद्धिदर खुम्चिएको तथ्यांकले देखाएको छ ।