काठमाडौँ, चैत २१ । बुधबार नेप्से परिसूचक ३.४३ अंक घटेर २००६.७८ विन्दुमा झरेको छ।
नेप्से घटेपनि आज कारोबार रकम भने सामान्य बढेको छ। अघिल्लो कारोबार दिन २ अर्ब २९ करोडको शेयर खरिदबिक्री भएको बजारमा आज ३२२ स्टकको ५२ हजार ६५ पटकको कारोबारमा २ अर्ब ५३ करोड ६२ लाख रुपैयाँ बराबरको ६४ लाख ८१ हजार कित्ता शेयर खरिदबिक्री भएको छ।
आज पनि शेयरमूल्य सर्वाधिक बढेका शीर्ष १० कम्पनीहरुमा सूचीमा ९ लघुवित्त कम्पनी रहेका छन्। जसमध्ये गुराँस लघुवित्तको शेयरमूल्य १० प्रतिशत बढेको छ भने विन नेपाल लघुवित्तको शेयरमूल्य करिब १० प्रतिशत बढेको छ। त्यस्तै, आज मानुषि लघुवित्तको शेयरमूल्य ९.९१ प्रतिशत बढेको छ। ३५ प्रतिशत लाभांश वितरण गर्ने घोषणा गरेको सूर्यज्योति लाइफ इन्स्योरेन्सको शेयरमूल्य ६.७४ प्रतिशत बढेको छ।
कारोबार रकमका आधारमा पनि आज सूर्यज्योति लाइफ इन्स्योरेन्स नै शीर्ष स्थानमा रहेको छ। सो इन्स्योरेन्सको २५ करोड ८० लाख रुपैयाँ बराबरको शेयर खरिदबिक्री भएको छ। आज सर्वोत्तम सिमेन्टको साढे १२ करोडभन्दा बढीको शेयर कारोबार भएको छ भने गोर्खाज फाइनान्सको कारोबार रकम साढे ११ करोड नाघेको छ।
