काठमाडौँ, चैत १२ । घरेलु टोली नेपाललाई ट्वान्टी-२० शृङ्खलाअन्तर्गत आयरल्यान्ड वुल्भ्सले सामान्य लक्ष्य प्रस्तुत गरेको छ । कीर्तिपुरस्थित त्रिवि खेल मैदानमा टस जितेर पहिला ब्याटिङ गर्ने निर्णय लिएको आयरल्यान्ड वुल्भ्सले निर्धारित २० ओभरमा सबै विकेट गुमाउँदै १२१ रन जोडेको हो ।
आयरल्यान्ड वुल्भ्सका लागि ओपनर स्टेफन डोहेनीले सर्वाधिक ४६ रन जोडिन् । ३९ बल खेलेका उनले ४ चौका र २ छक्का प्रहार गरे । अन्य खेलाडीले नेपालविरुद्ध खुलेर खेल्न भने सकेनन् । थोमस मेयस र लियाम मकार्थीले समान १६/१६ रन जोड्दा फिओन ह्यान्डले ११ रन जोडे । बाँकी खेलाडीले दोहोरो रन पनि छुन सकेनन् ।
नेपालका लागि ललित राजवंशी, गुलशन झा तथा कुशल भुर्तेलले समान २-२ विकेट लिए । यस्तै करण केसी र कुशल मल्लले १-१ विकेट लिए । नेपालले ८ बलरको प्रयोग गरेको थियो । जसमध्य सोमपाल कामी, दिपेन्द्र सिंह ऐरि र अविनाश बोहराले कुनै विकेट लिन सकेनन् ।
Published Date: 25 March 2024
