काठमाडौँ, फागुन ३ । आइसीसी क्रिकेट विश्वकप लिग-२ अन्तर्गत पहिलो खेलमा नेपाल नामिबियासँग पराजित भयो । यससँगै प्रशिक्षक मोन्टि देशाइको आगमनपछि नेपालले घरेलु ओडीआईमा पहिलो हार बेहोरेको छ ।
ठिक एक वर्षअघि नामिबियाकै खेलबाट नेपालले मोन्टि देशाइको प्रशिक्षणमा लिग-२ को यात्रा सुरु गरेको थियो । लिग-२ अन्तिम १२ खेलमध्य ८ खेल घरेलु मैदानमा खेलेको नेपालले सबै खेल जितेको थियो । त्यसबेला फेब्रुअरीको सिरिजमा नामिबिया र स्कटल्यान्डलाई २-२ खेल जितेको नेपालले यूएई भ्रमणमा पनि ४ मध्य ३ खेल जित्यो ।
मार्चमा भएको लिग-२ को अन्तिम सिरिज घरेलु मैदानमा खेलेको नेपालले त्यसमा पनि लगातार ४ जित निकाल्यो । समग्रमा घरेलु मैदानमा लिग-२ को ८ ओडीआई जितेको नेपालले त्यसपछि प्रिमियर कपमा पनि दुई ओडीआई जित्यो ।
प्रिमियर कपको समूह चरणमा ओमान र फाइनलमा यूएईलाई हराउँदै नेपालले शत प्रतिशत जितको सिलसिला कायम राखेको थियो । उक्त प्रतियोगिताको अन्य खेल भने ओडीआई मान्यता प्राप्त थिएनन् ।
गत साता नेपालले क्यानडाविरुद्ध लगातार ३ ओडीआई जित्दै सिरिज क्लिनस्विप गर्यो । देशाइको प्रशिक्षणमा नेपालले १३ ओडीआईमा शत प्रतिशत जित निकाल्यो ।
देशाइ आउनुअघि पनि नेपालले टियु मैदानमा नोभेम्बर २०२२ को यूएईविरुद्ध सिरिजमा लगातार दुई खेल जितेको थियो । त्यसबेला पहिलो खेल हारेको नेपालले त्यसपछि भने दुई खेल जित्दै २-१ ले सिरिज जितेको थियो । समग्रमा नेपालले टियु मैदानमा लगातार १५ ओडीआईमा जित हासिल गरेको हो ।
