काठमाडौँ, माघ २९ । नेपाली राष्ट्रिय क्रिकेट टोलीका ओपनर अनिल शाहले क्यानडाविरुद्ध लगातार अर्धशतक प्रहार गरेका छन् ।
क्यानडाविरुद्ध सोमबार जारी तेस्रो ओडीआई खेलमा अनिलले आक्रामक सुरुवात गर्दै अर्धशतक पूरा गरे । उनले ५१ बलमा अर्धशतक पूरा गरेका हुन् । यसक्रममा उनले ८ चौका प्रहार गरे ।
नेपालले १५ ओभरमा १ विकेट गुमाएर ८३ रन जोडेको छ । क्रिजमा भीम सार्की १३ रन जोडेर खेलिरहेका छन् । नेपालले २ सय ३३ रनको लक्ष्य पछ्याइरहेको छ ।
अनिलले आफूले सामना गरेको सुरुवाती ४ बलमा लगातार चौका प्रहार गरेका थिए । इनिङको दोस्रो ओभरमा उदय भगवानलाई आक्रमण गर्दै उनले आफ्नो लयलाई निरन्तरता दिएका थिए ।
पाँचौ ओभरमा ओपनर कुशल भुर्तेल आउट भएपछि उनले आफ्नो गतिमा ब्रेक लगाउनुपरेको थियो । अनिल र कुशलले पहिलो विकेटका लागि ४५ रन जोडेका थिए । कुशलले १४ बलमा ३ चौकासहित १३ रनको योगदान दिए ।
त्यसअघि क्यानडाले ५० ओभरमा ८ विकेट गुमाउँदै २ सय ३२ रन जोडेको थियो ।
