काठमाडौँ, माघ १५ । बलियो मानिएको युएई विरुद्ध पेनाल्टी शूटआउटमा जित दर्ता गर्दै पहिलो पटक एसियन कप खेलिरहेको ताजिकिस्तान क्वार्टरफाइनलमा प्रवेश गरेको छ । ताजिकिस्तानले टाईब्रेकरमा ५-३ को जित निकालेको हो ।
निर्धारित ९० मिनेट र त्यसपछिको ३० मिनेटको अतिरिक्त समय पनि १-१ को बराबरीमा सकिएपछि खेल टाईब्रेकर तर्फ धकेलिएको थियो ।
ताजिकिस्तानले खेलमा डिफेन्डर भाहदात हानोनोभको गोलमार्फत ३०औं मिनेटमा सुरुवाती अग्रता लिएको थियो । तर अन्तिम समयमा सम्हालिन नसक्दा खेल अतिरिक्त समयमा जान पुग्यो ।
इन्ज्युरी समयको पाँचौं मिनेटमा अलि सलेहको पासमा खलिफा अल हम्मादीले गोल गर्दै खेलमा बराबरी गर्दै खेल अतिरिक्त समयमा धकेलेका थिए । अतिरिक्त समयमा भने कुनै गोल नभएपछि खेल टाईब्रेकरमा गएको थियो ।
कायो कनेडोको पेनाल्टी ताजिकिस्तान गोलरक्षक रुस्तम यातिमोभले बचाएका थिए । अन्य सबै पेनाल्टी गोलमा परिणत भएका थिए । तर सो पेनाल्टी बचाउका साथ ताजिकिस्तान ५-३ ले विजयी भयो ।
ताजिकिस्तानले अब क्वार्टरफाइनलमा ईराक र जोर्डन बीचको विजेता विरुद्ध खेल्ने छ । ईराक र जोर्डन बीचको खेल आज ५:१५ बजे हुँदै छ । अर्को खेलमा आज नै ९:४५ बजे घरेलु टोली कतार र प्यालेस्टाइन भिड्ने छन् ।–एजेन्सी
