बेंगलुरु, माघ ४ । भारत तथा अफगानिस्तानबीचको तेस्रो टी२० इन्टरनेशनल अत्यन्त रोमाञ्चक शैलीमा टुंगिएको छ । प्रारम्भमा दुबै टीमबीच खेल टाइ भयो । त्यसपछि दुबै टीमले सुपर ओभरमा १६–१६ रन बनाए, फलस्वरुप उक्त सुपर ओभरसमेत टाइ भयो । त्यसपछि दोस्रो सुपर ओभरमा भारतीय टीम विजयी हुन सफल भयो ।
दोस्रो सुपर ओभरमा भारतीय टीमले पाँच बलमा ११ रन बनाएको थियो । त्यसपछि कप्तान रोहित शर्माले स्पिनर रवि बिश्नोइलाई बलिङको जिम्मेवारी दिए । बिश्नोईले आफ्नो स्पिनको कला प्रदर्शन गर्दै अफगानिस्तानलाई तीन बलमै एक रनमा सिमित बनाए । बिश्नोईले मोहम्मद नबी तथा रहमनुल्लाह गुरबाजलाई शिकार बनाए ।
यो जीतसंगै भारतीय टीमले अफगानिस्तानलाई तीन खेलको टी२० सीरीजमा ३–० ले क्लीन स्वीप गरिदिएको छ । यो खेलमा रोहित शर्माले कीर्तिमानी शतक प्रहार गरे भने रिंकू सिंहले पनि विष्फोटक अर्धशतक बनाए ।
बुधवार राति सम्पन्न भएको खेलमा २१३ रनको लक्ष्य पछ्याउने क्रममा अफगानिस्तानको टीमले ६ विकेटमा २१२ रन बनाउन सफल भयो । यही कारण यो खेल टाइ भयो । यो खेलमा अफगानिस्तानका लागि गुरबाज तथा इब्राहिम जादरानले ५०–५० रनको इनिङ खेले । मोहम्मद नबीले १६ बलमा ३४ रन बनाए भने गुरबदीन नाइबले २३ बलमा ५५ रन बनाए ।
भारतीय स्पिनर वाशिङ्टन सुन्दरले सबैभन्दा बढी तीन विकेट लिए भने आवेश खान तथा कुलदीप यादवले एक–एक विकेट लिए ।
त्यसअघि, भारतीय खेलाडीहरुले उत्कृष्ट ब्याटिङ गर्दै अफगानिस्तानलाई जीतका लागि २१३ रनको लक्ष्य दिएका थिए । टस जितेर पहिला ब्याटिङ गर्दै भारतले चार विकेटको क्षतिमा २१२ रन जोडेको थियो ।
आजको खेलमा भारतले एक समयमा २२ रनमा ४ विकेट गुमाइसकेको थियो । ओपनर यशस्वी जायसवाल चार रन बनाएर आउट भए भने विराट कोहली पहिलो बलमै पेभिलियन फर्किए । त्यसपछि शिवम दुबे (एक रन) तथा सञ्जु सामसन (० रन) पनि आउट भए ।
यद्यपि, त्यसपछि कप्तान रोहित शर्माले रिंकू सिंहसंग मिलेर इनिङलाई सम्हाल्दै पाँचौं विकेटका लागि ९५ बलमा १९० रनको साझेदारी गरे ।
रोहित शर्माले ६४ बलमा शतक प्रहार गर्दै पुनः एक पटक इतिहास रचेका छन् । उनी टी२० इन्टरनेशनल क्रिकेटमा पाँच शतक प्रहार गर्ने पहिलो खेलाडी बनेका छन् । त्यसपछि रिंकू सिंहले पनि टी२० इन्टरनेशनलमा आफ्नो दोस्रो अर्धशतक जमाए । रिंकूले ३६ बलमा अर्धशतक पुरा गरे ।
आजको खेलमा रोहितले ६९ बलमा अविजित १२१ रन बनाए । त्यसक्रममा उनले ८ चौका तथा ११ छक्का प्रहार गरे । अर्कोतिर रिंकू सिंहले ३९ बलमा ६९ रनको अविजित इनिङ खेले । उनले छ छक्का तथा दुई चौका प्रहार गरे ।
रोहितले सीरीजमा पहिलो पटक खाता खोलेका हुन् । उनले तेस्रो खेलमा आफ्नो सातौं बलमा एक रन लिएर खाता खोलेका थिए । त्यसअघि उनको ब्याटबाट चौका पनि लागेको थियो, तर अम्पायर वीरेन्द्र शर्माले त्यसलाई बाईको चौका बताए । रोहित सीरीजका अघिल्ला दुई खेलमा खातै नखोली आउट भएका थिए ।
आजको खेलमा भारतको तर्फबाट अक्षर पटेल, अर्शदीप सिंह तथा जितेश शर्मालाई आराम दिएर सञ्जू सामसन, आवेश खान तथा कुलदीप यादवलाई बोलाइएको थियो ।
