काठमाडौं, पुस २५ । प्रिमियर लिग क्लब चेल्सीले इएफएल कप अर्थात कारवाओ कपको सेमिफाइनलको पहिलो लेगमा हार बेहोरेको छ । चेल्सी च्याम्पियनसिप क्लब मिडल्सब्रगसँग १–० ले पराजित भएको हो ।
चेल्सीलाई हार चखाउन पहिलो हाफमा हेडेन ह्याक्नीले पहिलो हाफमा गरेको गोल नै निर्णायक बन्यो । उनले ३७औं मिनेटमा आइसेह जोन्सको पासमा गोल गर्न सफल भएका थिए ।
त्यसअघि रिभरसाइड स्टेडियम मिडल्सब्रगमा मंगलबार राति भएको खेलको पहिलो हाफमै कोल पाल्मेरले तीन सुवर्ण अवसर खेर फाल्दा चेल्सी अग्रता लिनबाट चुकेको थियो ।
एक गोलले पछि परेको चेल्सीले ७२ प्रतिशत बल पोसेसन राखेपनि मिडल्सब्रगको बलियो रक्षापङ्ति तोड्न नसक्दा पहिलो लेगमा स्तब्ध बन्न पुग्यो । चेल्सीलाई हार चखाउन मिडल्सब्रगका गोलरक्षक थोमस ग्लोभरले सानदार प्रदर्शनसहित बचाउ गरे ।
अब दोस्रो लेगको खेल २४ जनवरीमा हुनेछ । यस खेलमा स्पष्ट २–० को जित निकाल्न सके चेल्सी फाइनलमा पुग्नेछ । बराबरी र हारको नतिजाले चेल्सी सेमिफाइनलबाटै बाहिरिनेछ । १–० को जितले पनि फाइनल पुग्ने सम्भावना जीवित रहनेछ ।मिडल्सब्रगलाई बराबरीको नतिजा नै फाइनल पुग्न पर्याप्त हुनेछ ।
अर्काे सेमिफाइनलको पहिलो लेगमा आज राति लिभरपुल र फुलहमबीच प्रतिस्पर्धा हुँदैछ । यि दुई टोलीबीचको दोस्रो लेग २५ जनवरीमा हुनेछ । फाइनल २६ फेब्रुअरीमा हुनेछ । –एजेन्सी
Published Date: 10 January 2024
