बालकुमारी घटना छानविन गर्न डीआइजीको नेतृत्वमा तीन सदस्यीय समिति गठन

काठमाडौं, पुस १३ । लतिलपुरको बालकुमारीमा ईपीएस परीक्षा दिन पाउनु पर्ने माग गर्दै भएको प्रदर्शनका क्रममा दुई युवकको ज्यान गएको घटनाको छानविन गर्न सरकारले तीन सदस्यीय समिति गठन गरेको छ ।

गृह मन्त्रालयले भर्खरै गठन गरेको छानविन समितिमा उपत्यका प्रहरी कार्यालयका डीआइजी लालमणि आचार्य संयोजक छन् । सदस्यमा ललितपुर जिल्ला प्रशासन कार्यलयका सहायक सीडीओ अमरदीप सुनुवार र राष्ट्रिय अनुसन्धान विभागका उपनिर्देशक बासु सिग्देल रहेको गृह मन्त्रालय स्रोतले जानकारी दियो । समितिलाई सात दिनभित्र घटनाको सत्यतथ्य पत्ता लगाएर प्रतिवेदन बुझाउन भनिएको गृह मन्त्रीका प्रेस सल्लाहकार कमल गिरीले जानकारी दिए ।

यसअघि पानी जहाज निर्माणको कामका लागि परीक्षा दिएर अनुत्तीर्ण करिब २८ हजार परीक्षार्थीले औद्योगिक क्षेत्रका लागि आवेदन दिन नपाउने भएपछि आन्दोलन गरेका हुन् । आन्दोलनकारीले शुक्रबार बिहान भौतिक पूर्वाधार तथा यातायात मन्त्री प्रकाश ज्वाला सवार गाडी आगजनी गरेका थिए । त्यसपछि प्रहरीले बल प्रयोग गर्दा दुई जनाको ज्यान गएको छ । प्रदर्शनका क्रममा घाइते पाटन अस्पतालमा उपचाररत वीरेन्द्र शाह र किस्ट अस्पतालमा उपचाररत २३ वर्षीय सुजन राउतको मृत्यु भएको होे ।

राउतको गोली लागेर मृत्यु भएको यसअघि प्रहरीले बताए पनि अस्पतालले गरेको जाँचमा गोली लागेको पाइएको छैन । उनको छातीमा दाग देखिएको छ । एक जनाको गोली लागेको छ भने अर्काको शरीरमा चोट लागेको छ । यसैबीच शुक्रबार नै उच्च अदालत पाटनले सबैलाई परीक्षामा सामेल गराउन आदेश दिएको छ ।