भक्तपुर,माघ ३।भक्तपुरको महेश्वरी बैंक्वेटमा हुने स्टुडेन्टस् बुक फेयरको तयारी अन्तिम चरणमा पुगेको छ । बुक क्लब भक्तपुरको आयोजनामा संचालन हुने माघ ५ देखि ७ सम्म पुस्तक मेला तयारी पुरा भएको आयोजकले जनाएको छ । मुख्यतः विद्यालय र कलेजस्तरका बालबालिका र किशोरकिशोरीबीच पुस्तक पढ्ने संस्कृति प्रबद्र्धन गर्ने लक्ष्य सहित आयोजना हुन लागेको बुक फेयरमा सो उमेर समूहका लागि उपयुक्त पाठ्य सामग्री सहुलियत दरमा बिक्री वितरण हुने बताइएको छ । पुस्तक मेलामा २० भन्दा बढी पुस्तक प्रकाशक तथा वितरण संस्थाको सहभागिता रहने छ ।
पुस्तक मेलाको उद्घाटन कार्यक्रममा रंगकर्मी सुनिल पोखरेल, शिक्षक योगेन्द्रमान बिजुक्छें र साहित्यकार बिना थिङले नयाँ पुस्ताबीच पठन संस्कृतिको प्रबद्र्धनबारे प्रवचनका साथै युवाहरु बीच पुस्तक बार्ता कार्यक्रम हुने जानकारी दिएको छ। त्यस्तै माघ ६ गते कविता तथा कथा वाचन हुनेछ भने माघ ७ गते पोषण विज्ञ डा. अरुणा उप्रेतीले किशोरकिशोरीको स्वास्थ्य र पोषणबारे व्याख्यान दिने बताइएको छ । सो क्रममा किशोरकिशोरीबीच पुस्तक अध्ययनबारे अन्तरक्रिया, साहित्य वाचन तथा सांगीतिक कार्यक्रम हुनेछ ।
त्यस्तै प्रदर्शनमा भक्तपुरको मौलिक खानाका परिकार , चलचित्र प्रदर्शनी, मृतिका कला, कला कार्यशाला, लिपि कार्यशाला, कार्टुन कार्यशाला लगायत विभिन्न कार्यक्रम रहने आयोजकले जनाएको छ । माघ ५ देखि ७ सम्म पुस्तक मेलामा प्रवेश निःशुल्क हुनेछ ।
