काठमाडौँ, असोज ३ । फिल्म ‘कौसीद’को ट्रेलर सार्वजनिक गर्दै प्रदर्शन मिती पक्का गरिएको छ । कुमार भास्करद्वारा निर्देशित फिल्मको ट्रेलरमा वित्तिय ऋणको चपेटामा परेको एक दाम्पतीको पीडादायी कथालाई भनिएको छ ।
सार्वजनिक ट्रेलरबाट फिल्ममा अभिनेत्री ऋचा शर्मा र अभिनेता भोलाराज सापकोटा श्रीमान श्रीमतीको भूमिकामा छन् । केदार भुषाल निर्माता रहेको सिनेमामा रुपेश दाहाल, परिक्षित विक्रम राणा, सदिक्षा गौतम, निर्भिक भट्टराई, सागर भट्टराई, सन्दीप लोहनीलगायतको पनि अभिनय रहेको छ । सिनेमाको कार्यकारी निर्मातामा दिमेश श्रेष्ठ र सह-निर्मातामा लक्ष्मण बानियाँ रहेका छन् ।
बड पिक्चर्स र ट्रिडेन्ट कन्सेप्टको संयुक्त निर्माण रहेको सिनेमामा भीम विश्वकर्माको सम्पादन, गिरिश-रोशन र रिवाज कोइरालाको ब्याकग्राउन्ड स्कोर, सुदीप पाण्डेको कलर तथा भीएफएक्स रहेको छ । नवविजय प्रकाश श्रेष्ठ र धिर्जन थपलियाले मिलेर लेखेको सिनेमामा निसाल पौडेलको छायांकन रहेको छ ।
असोज २६ गते नै ‘कौसीद’ सँग नारायण रायमाझी निर्देशित सिनेमा ‘परदेशी २’ पनि प्रदर्शनमा आउँदैछ ।
