काठमाडौं, भदौ २४ । एसियाको पावरहाउस जापानले अन्तर्राष्ट्रिय मैत्रीपूर्ण खेलमा जर्मनीलाई ४-१ ले पराजित गरेको छ ।
जर्मनीस्थित वल्फ्सबर्गको घरेलु मैदानमा भएको खेलमा जापानले इन्ज्युरी समयमा दुई गोल थप्दै फराकिलो जित पक्का गरेको थियो । जापानका लागि जुन्या इटो, अयासे उएदा, तकुमा असानो र आओ तानाकाले १-१ गोल गरे । जर्मनीका लेरोय सानेले बराबरी गोल फर्काएपनि नतिजा बदल्न पर्याप्त रहेन ।
खेलमा जुन्या इटोको गोलमा जापानले ११ औं मिनेटमा अग्रता लिएको थियो । तर १९ औं मिनेटमा सानेले खेल बराबरीमा ल्याए । त्यसको ३ मिनेटपछि नै उएदाले जापानलाई अग्रता दिलाए ।
२-१ को अग्रता लिएको जापानले दोस्रो हाफको इन्ज्युरी समयमा थप २ गोल गर्यो । ९० औं मिनेटमा असानोले गोल गरे । त्यसपछि तानाकाले अर्को गोल थप्दै फराकिलो जित पक्का गरे ।
घरेलु मैदानमा जर्मनीले बल पोसेसनमा पकड जमाएपनि जित दर्ता गर्न सकेन । यसअघि विश्वकपमा पनि निराशाजनक नतिजा निकालेको जर्मनीका प्रशिक्षक हान्सी फ्लिक यस नतिजासँगै थप दबाबमा आएका छन् ।
विश्वकपमा जापानसँग २-१ ले पराजित जर्मनी समूह चरणबाट बाहिरिएको थियो ।
Published Date: 10 September 2023
