काठमाडौं, भदौ १९ । हेल्लो सरकारको २४ घण्टे सेवा सुरुवातपछि कार्यान्वयन प्रक्रियालाई तीव्रता दिएसँगै यसमा आउने गुनासा बढ्न थालेको छ । पछिल्लो समय प्रधानमन्त्री पुष्पकमल दाहालले बिगु गाउँपालिका दोलखाको गुनासो सम्बोधन गरी आइतबार शुभारम्भ गरेका थिए ।
उक्त सेवापश्चात फोनमार्फत गुनासो टिपाउने संख्या अधिक रहेको तथा आम नागरिकको चासो र विश्वास बढेको देखिएको छ । नागरिकले ११११ मा फोन उठ्छ कि उठ्दैन भनी जाँच गर्ने गरेको पाइएको छ । यस्तै, नयाँ सुरुवातका लागि शुभकामना दिनका लागि फोन गर्नेको संख्या पनि टन्नै छ । आर्थिक सहायताका लागि, विकास निर्माणका लागि, बजेट व्यवस्थापनका लागि, अनियमितता, विकास निर्माणका कार्यमा भएको ढिलाइलगायतका विषयमा पनि नागरिकका गुनासो बढेको छ ।
यस्तै सहकारी ठगी, अनलाइन ठगीका विषय दैनिकरुपमा बढ्दो क्रममा रहेको छ । सामान्य सुझाव तथा सोधपुछका विषयका सम्बन्धमा पनि गुनासा आएकाले त्यसको सम्बोधन तत्काल टेलिफोनमार्फत गरिएको प्रधानमन्त्री तथा मन्त्रिपरिषद् कार्यालयले जनाएको छ । यस्तै, प्यान लिन के गर्नुपर्छ ? नागरिकताको विवरण कसरी सच्चाउन मिल्छ ? जस्ता जानकारी पनि माग हुने गरेको पाइएको छ । फेसबुक, ट्वीटरलगायत सामाजिक सञ्जालमा समेत गुनासोकर्ताबाट उल्लेख्य गुनासो आएको जानकारीमा छ।
