काठमाडौं, भदौ ८ । देशको निजी क्षेत्रको छाता संगठन नेपाल चेम्बर अफ कमर्स (एनसीसी)ले जापानबाट नेपालमा थप लगानी भित्र्याउन नेपाल भ्रमणमा रहेका जापानी सांसदहरुलाई सहयोग गर्न आग्रह गरेको छ ।
जापानको संसद्को माथिल्लो सदनका सदस्य तथा नेपाल–जापान संसदीय मैत्री समूहका सदस्य कोबायासी काजुहिरो र नागाइ मनबु अहिले नेपालको भ्रमणमा छन् ।
बिहीबारको भेटमा एनसीसीका प्रतिनिधिहरुले नेपाल र जापानबीचको कूटनीतिक र आर्थिक सम्बन्ध ऐतिहासिक रहेको भन्दै नेपालमा जापानी लगानी बढाउन जापानी सांसदहरुलाई पहल गर्न आग्रह गरेका थिए ।
सो अवसरमा एनसीसीका अध्यक्ष राजेन्द्र मल्लले नेपाल र जापानबीचको आपसी सहयोगलाई लगानी र व्यापार साझेदारी अभिवृद्धि गरी थप प्रगाढ बनाउनुपर्ने बताए ।
मल्लले नेपालको जलविद्युत, पूर्वाधार, पर्यटन र प्रविधि क्षेत्रमा थप लगानीको वातावरण बनाउन जापानी सांसदहरुलाई आग्रह समेत गरे ।
उनले कृषिमा प्रविधि हस्तान्तरणले नेपाललाई थप फाइदा पुग्ने बताए ।
