काठमाडौं, भदौ ६ । बुधबारदेखि परेको अविरल वर्षाका कारण आन्तरिक उडान प्रभावित भएको त्रिभुवन अन्तर्राष्ट्रिय विमानस्थल कार्यालयले विज्ञप्तिमार्फत जनाएको छ । भिजिबिलिटी कम भएकाले उडान प्रभावित भएका छन् ।
प्रतिकूल मौसमका कारण आन्तरिक उडान स्थगन गरिएको त्रिआयाका महाप्रबन्धक प्रतापबाबु तिवारीले बताए । आन्तरिक उडान प्रभावित भए पनि अन्तर्राष्ट्रिय उडान भने नियमित सञ्चालन भइरहेको उनले बताए ।
एयरलाइन्स कम्पनीहरूले बुधबार धेरै गन्तव्यहरूमा आन्तरिक उडानहरू रद्द गरिएको बताए। सुर्खेतका दुई र तुम्लिङटारको एउटा उडान रद्द भएको बुद्ध एयरका सूचना अधिकारी दीपेन्द्रकुमार कर्णले जानकारी दिए ।
त्यस्तै पोखराबाट भरतपुर र पोखरा–नेपालगञ्ज रुटका सबै उडान रद्द गरिएको छ । काठमाडौं–पोखरा उडान आंशिक रुपमा प्रभावित भए पनि दिउँसो सुचारु भएको छ ।
जल तथा मौसम विज्ञान विभाग, जल तथा मौसम पूर्वानुमान महाशाखाले आगामी तीन दिनसम्म वर्षाको सम्भावना रहेको जनाएको छ । बुधबार काठमाडौं उपत्यकासहित देशका अधिकांश स्थानमा हल्कादेखि मध्यम वर्षा भइरहेको छ ।
