काठमाडौं, भदौ ५ । राष्ट्रपति रामचन्द्र पौडेलको आह्वानमा शीतल निवासमा सर्वदलीय बैठक बसिरहेको छ । पूर्व निर्धारित कार्यक्रमबमोजिम राष्ट्रपतिले आज (मंगलबार) बिहान सबै राजनीतिक दललाई छलफलका लागि शीतल निवास बोलाएका हुन् ।
बैठकमा प्रमुख प्रतिपक्षी दल नेकपा एमाले बाहेकका दल मात्र सहभागी छन् । खासगरी प्रमुख प्रतिपक्ष दल नेकपा एमालेले एक महिनादेखि संसद्मा गरिरहेको अवरोध खुलाउने विषयमा राष्ट्रपतिद्वारा आइतबार नै निर्धारित समयअनुसार आज सर्वदलीय बैठक बसेको हो । नेकपा एमालेका एक नेताले दिएको जानकारीअनुसार राष्ट्रपतिले बोलाएको छलफलप्रति एमालेको विमति छ ।
‘हिजो बेलुकी नै लगभग टुंगिएको छ’, एमाले संसदीय दलका उपनेता सुवास नेम्वाङले भने, ‘प्रधानमन्त्रीकै पहलमा लगातार बैठक भइरहेको छ । प्रधानमन्त्रीकै सल्लाहमा राख्ने हो क्यारे । राष्ट्रपतिले कताबाट राख्नु भयो थाहा भएन ।’ तर यसबीच (सोमबार राति) संसद्को अवरोध हटाउन एमाले तयार भइसकेको छ । आजैबाट संसद् बैठक सञ्चालन हुने अपेक्षा गरिएको छ ।
Published Date: 22 August 2023
