काठमाडौं, साउन २० । नेपाल बैंक लिमिटेडले गत आर्थिक वर्षको चौथो त्रैमाससम्मको वित्तीय विवरण सार्वजनिक गरेको छ । गत आर्थिक वर्षको असार मसान्तसम्ममा बैंकले ३ अर्ब ४१ करोड १५ लाख २६ रुपैयाँ खुद नाफा कमाएको छ । जुन अघिल्लो आर्थिक वर्षको भन्दा १६.७० प्रतिशत बढी हो । अघिल्लो आर्थिक वर्षको सोही अवधिसम्ममा बैंकले २ अर्ब ९२ करोड ३२ लाख रुपैयाँ खुद नाफा कमाएको थियो।
यस अवधिमा कम्पनीको खुद ब्याज आम्दानी र संचालन नाफामा समेत सुधार देखिएको छ । बैंकको खुद ब्याज आम्दानी ४०.६१ प्रतिशत बढेर ९ अर्ब ४४ करोड १५ लाख ५३ हजार पुगेको छ । अघिल्लो आर्थिक वर्षको सोहि अवधिमा उक्त आम्दानी ६ अर्ब ७१ करोड ४५ लाख ८६ हजार रुपैयाँ रहेको थियो ।
त्यस्तै, अघिल्लो आर्थिक वर्षको चौथौ त्रैमाससम्ममा ३ अर्ब ६३ करोड ७४ लाख रुपैयाँ रहेको कम्पनीको संचालन नाफा गत आर्थिक वर्षको सोहि अवधिमा २१.२० प्रतिशतले बढेर ४ अर्ब ४० करोड ८२ लाख रुपैयाँ पुगेको छ ।
समिक्षा अवधिमा कम्पनीको वितरणयोग्य मुनाफा ९७ करोड ३३ लाख रुपैयाँ, चुक्ता पूँजी १४ अर्ब ६९ करोड ४० लाख रुपैयाँ, जगेडा कोष २१ अर्ब ८८ करोड ४८ लाख रुपैयाँ रहेको छ । बैंकको लाभांश क्षमता ६.६२ प्रतिशत रहेको छ ।
कम्पनीको प्रतिसेयर आम्दानी २ रुपैयाँ ९२ पैसा बढेर २३ रुपैयाँ २२ पैसा र प्रतिसेयर नेटवर्थ २४८ रुपैयाँ ९४ पैसा रहेको छ ।
