काठमाडौं, असार २० । नेपालले चालु आर्थिक वर्षको पहिलो ११ महिनामा रु दुई अर्बभन्दा बढीको चाउचाउ र पास्ता निर्यात गरेको छ ।
भन्सार विभागका अनुसार चालु आर्थिक वर्षको असार मसान्तसम्म नेपालबाट २ अर्ब ११ करोड रुपैयाँ बराबरको ७२३ हजार ४४५ केजी चाउचाउ र पास्ता निर्यात भएको छ ।
अघिल्लो वर्षको सोही अवधिमा नेपालले १ अर्ब ६६ करोड रुपैयाँको चाउचाउ निर्यात गरेको थियो । अघिल्लो वर्षको तुलनामा चालु आर्थिक वर्षको ११ महिनामा पास्ता र चाउचाउको निर्यात २६ दशमलव ९ प्रतिशतले बढेको भन्सार विभागको तथ्यांकले देखाएको छ ।
खासगरी नेपालको पास्ता र चाउचाउ भारतमा निर्यात हुने गरेको छ । नेपालले भारतमा मात्र रु ९६ करोड ५० लाखको ५ लाख २७ हजार किलो चाउचाउ र पास्ता निर्यात गरेको छ । भारतपछि नेपालले चीनमा ५० करोड ९० लाख रुपैयाँको ६९ हजार किलो चाउचाउ र पास्ता निर्यात गरेको थियो ।
त्यसबाहेक अस्ट्रेलिया, अमेरिकालगायत तेस्रो मुलुकमा नेपाली चाउचाउ र पास्ताको उच्च माग रहेको छ ।
समीक्षा अवधिमा अमेरिकामा रु १८ करोड ५९ लाख बराबरको ६ लाख २० हजार केजी चाउचाउ र पास्ता निर्यात भएको छ । त्यसैगरी चालु आर्थिक वर्षको ११ महिनामा नेपालले भुटानमा ३९ लाख, क्यानडामा १४ करोड १० लाख, हङकङमा ३३ लाख, इटालीमा २९ करोड ६० लाख रुपैयाँको चाउचाउ र पास्ता निकासी गरेको छ ।
त्यसैगरी नेपालबाट जापानमा ८ करोड २५ लाख, दक्षिण कोरिया ४३ लाख, मलेसियाले २७ करोड ३० लाख, माल्टा एक करोड, कतार ९९ लाख, सिंगापुर ३३ लाख, युएई १३ करोड ५५ लाख रुपैयाँको चाउचाउ र पास्ता निकासी भएको छ । मिलियन, बेलायतले रु २९.८ करोड र यमनलाई रु ७१ लाखको पास्ता र चाउचाउ पठाएको छ ।
Published Date: 05 July 2023
