चितवन, असार ८ । चितवन राष्ट्रिय निकुञ्जमा गएको ११ महिनामा २२ वटा एकसिङ्गे गैँडा र तीनवटा बाघसहित १०९ वन्यजन्तुको मृत्यु भएको छ ।
निकुञ्जका अनुसार ७१ वन्यजन्तुको मृत्यु वृद्धावस्था, बिरामी र अन्य जनावरको आक्रमणबाट भएको थियो ।
त्यसैगरी कुकुरको आक्रमणबाट २६ जनावरको मृत्यु भएको, विद्युत करेन्ट लागेर दुई, आपसी लडाइँबाट एक, सिकारी मारेर एक, एक बगेर र एक बालुवामा लडेर मृत्यु भएको नेकपाका सूचना अधिकारी गणेशप्रसाद तिवारीले बताए ।
त्यसैगरी दुई वटा जनावरको मृत्युको कारण भने पुष्टि हुन सकेको छैन भने तीन जनाको अन्य विभिन्न कारणले मृत्यु भएको छ । मरेका गैँडामध्ये नवलपरासीमा १३ र चितवन जिल्लामा नौ वटा भेटिएका छन् ।
तिवारीले निकुञ्जका तीनवटै बाघको प्राकृतिक कारणले मृत्यु भएको बताए । यस अवधिमा चितवन राष्ट्रिय निकुञ्जमा दुई हात्तीको मृत्यु भएको छ । सो अवधिमा ११७ वन्यजन्तुको उद्धार गरिएको नेकपाले जनाएको छ ।
