काठमाडौं, असार ३ । गर्भमा लिंगको पहिचान गर्नेलाई कानूनी कारबाही हुने स्वास्थ्य तथा जनसंख्या मन्त्रालयले जनाएको छ । गर्भमा लिंग पहिचान गरेमा वा गराएमा ३ महिनादेखि १ वर्ष सम्म कैद सजाय हुन सक्ने भन्दै त्यस्तो कार्य नगर्न सुझाएको हो ।
छोरीको जन्म सुनिश्चित गर्न र विभेदपूर्ण लिंग छनोटको अन्त्यका लागि सबैमा सचेतना अभिबृद्धि गर्न मन्त्रालयले आग्रह गरेको छ ।
नेपालमा राष्ट्रिय जनगणना २०७८ को नतिजा अनुसार लैंगिक अनुपातमा असमानता देखा पर्न लागेको र विभेदपूर्ण लिंग छनौटको अन्त्यका लागि राष्ट्रि रणनीति २०७८–२०८८ मा समेत विभेदपूर्ण लिङ्ग छनौटको अन्त्य गर्ने कार्यनीति तथा कार्ययोजना रहेको छ । साथै मुलुकी अपराध संहिता २०७४ को दफा १८८ को उपदफा ७ र ८ मा एवम् सुरक्षित मातृत्व तथा प्रजनन स्वास्थ्य अधिकार ऐन २०७५ को दफा १७ मा समेत गर्भको लिङ्ग पहिचान गर्ने कार्यलाई कानुनत दण्डनीय अपराध मानेको छ ।
