भक्तपुर, जेठ १६ । सामाजिक अध्ययन र सिकाईका लागि काठमाडौँ, बुद्धनगरमा रहेको कादम्बरी मेमोरियल कलेजको स्नातक तह दोश्रो सेमेष्टर, सामाजिक कार्यमा अध्ययनरत विद्यार्थीहरुले भक्तपुर नगरपालिका वडा नं २ को अवलोकन गरेका छन्।
सो अध्ययन/अवोलोकनको क्रममा सहभागी विद्यार्थीहरुले भनपा वडा नं २ का वडा अध्यक्ष हरिप्रसाद बासुकलालाई आ आफ्नो जिज्ञासा राखेका थिए । समुदायमा सामाजिक नक्साङ्कन कार्य गर्नुका साथै वडाका विविध कार्यहरुको जानकारी लिंदै वडा नं २ को भ्रमण पनि गरेका थिए।
सोही कार्यक्रमा विद्यार्थीहरुले सन्देशमूलक नाटक पनि प्रस्तुत गरेका थिए। आजभोलिको आधुनिक जीवनशैलीसँगै छोराछोरीहरु विदेश पलायन हुने क्रम बढ्दै गरेको अवस्थामा जेष्ठ अभिभावकहरूको जीवनयापनमा दैनिक जसो समस्या आइरहेको कुरालाई समेटेर नाटक प्रस्तुत गरेका थिए।
उक्त नाटकले परिवारका जेष्ठ सदस्यलाई सम्मान, सद्भाव र साथ दिनु हरेक छोराछोरीको कर्तव्य हो भन्ने मूल सन्देश प्रदान गरेको थियो।
