काठमाडौँ, जेठ ३ । राष्ट्रिय बाणिज्य बैंकले एसिसी प्रिमियर कप विजेता नेपाली क्रिकेट टोलीका खेलाडीलाई जनही एक लाख रुपैयाँ प्रदान गर्ने भएको छ । नेपाल क्रिकेट संघ (क्यान) का कार्यवाहक सचिव दुर्गाराज पाठक र बाणिज्य बैंकका प्रमुख कार्यकारी अधिकृत किरण श्रेष्ठबीच बुधबार भेटवार्ता भएको थियो ।
प्रिमियर कपमा रहेका १४ र ४ वैकल्पिक खेलाडी गरि कुल १८ खेलाडीलाई बाणिज्य बैंकले जनही एक लाख रुपैयाँ दिने भएको छ । त्यस्तै टोलीका मुख्य प्रशिक्षक सहित अन्य सबै अफिसललाई जनही ५० हजार रुपैयाँ दिने भएको छ ।
पाठकले आगमी दिनमा दीर्घकालिन रुपमा अघि बढ्ने छलफल समेत भएको बताएका छन् । ‘हामी दीर्घकालिन रुपमा अघि बढ्ने छलफल पनि भएको छ । वहाँहरु पनि सकरात्मकनै हुनुन्छ । आगमी दिनमा सम्झौता गरेर अघि बढ्छौं होला’, पाठकले हाम्रो खेलकुदसँग भने ।
सरकारले भने प्रिमियर कप विजेता टोलीका हरेक सदस्य खेलाडी र मुख्य प्रशिक्षक मोन्टि देशाईलाई जनही ६ लाख दिने घोषणा गरेको थियो । त्यस्तै टोलीका अन्य व्यवस्थापक र साहयक प्रशिक्षकहरुलाई भने समान तीन लाख दिने भएको छ ।
नेपालले एसिसी प्रिमियर कपको फाइनलमा युएईलाई ७ विकेटले हराउँदै नेपालले २१ वर्षपछि एसिया कपमा स्थान बनाएको थियो।
एसिया कप २०२३ आगमी सेप्टेम्बरमा पाकिस्तानमा हुनेछ । नेपाल, भारत र पाकिस्तान एकै समूह ए मा छन् । समूह बी मा बंगलादेश, श्रीलंका र अफगानिस्तान छन् । हरेक समूहको शीर्ष दुई टोलीले सुपर फोरमा स्थान बनाउनेछन् । सुपर फोरबाट शीर्ष दुई टोली फाइनल खेल्नेछन् ।
