काठमाडौं, वैशाख २९ । प्रधानमन्त्री पुष्पकमल दाहालले नक्कली भुटानी शरणार्थी काण्डमा संलग्न जोसुकैलाई पनि कानुनी कठघरामा ल्याइने प्रतिबद्धता व्यक्त गरेका छन् ।
राष्ट्रिय प्रजातन्त्र पार्टी (राप्रपा)ले शुक्रबार प्रधानमन्त्री तथा मन्त्रिपरिषद्को कार्यालयमा बुझाएको ज्ञापनपत्र ग्रहण गर्दै प्रधानमन्त्री दाहालले निर्दोषलाई कारवाही हुन नदिने र दोषीलाई छाड्न नहुनेमा सरकार स्पष्ट रहेको बताए ।
भुटानी शरणार्थीको ढाँचामा अमेरिका पठाउने रैकेटको प्रहरीले पर्दाफास गरेको छ । घोटालामा संलग्न केही उच्च पदस्थ व्यक्तिसहित एक दर्जनभन्दा बढी पक्राउ परेका छन् ।
प्रधानमन्त्री दाहालले राप्रपाको टोलीलाई घोटालाको चलिरहेको अनुसन्धानमा कुनै दबाबको प्रभाव नआउने आश्वासन दिएका छन् ।
वर्तमान सरकार सुशासन, समृद्धि र संविधानको कार्यान्वयनका लागि पूर्ण प्रतिबद्ध रहेको बताउँदै दाहालले घोटालामा आफूले कसैको दबाब र प्रभावमा नपर्ने बताए ।
ज्ञापनपत्रमा राप्रपाका अध्यक्ष लिङ्देनले विसं २०४६ पछिका राजनीतिक नेतृत्व र कर्मचारीको सम्पत्ति छानबिन गर्न माग गरेका छन् ।
प्रधानमन्त्रीलाई ज्ञापनपत्र बुझाएपछि सञ्चारकर्मीसँग कुरा गर्दै राप्रपाका अध्यक्ष लिङ्देनले नक्कली भुटानी शरणार्थी घोटालाको निष्पक्ष छानबिन गर्न प्रधानमन्त्रीको ध्यानाकर्षण गराएको बताए ।
प्रधानमन्त्रीले ज्ञापनपत्र स्वीकार गर्दै घोटालाको अनुसन्धानमा कुनै त्रुटि नहुने आश्वासन दिनुभएको प्रधानमन्त्रीलाई उद्धृत गर्दै लिङ्देनले भने ।
Published Date: 12 May 2023
