काठमाडौं, वैशाख २५ । विभागीय नेपाल पुलिस क्लब र मनाङ–मर्स्याङ्दी क्लबले सहिद स्मारक ‘ए’ डिभिजन लिगमा रोमाञ्चक बराबरी खेल्दै अंक बाँडेका छन् ।
पुलिस र मनाङले २–२ गोलको बराबरी खेल्दै अंक बाँडेका हुन् । पुलिसका एहमद हिजाजीले दुई गोल गर्दा मनाङका रोशन राना मगर र सायिदजमोल दभ्लातजोनोभले गोल गरे ।
सातदोबाटोस्थित एन्फा कम्प्लेक्सको खेल मैदानमा सोमबार भएको खेलको १६औं मिनेटमा एहमद हिजाजीको गोलबाट पुलिसले सुरुवाती अग्रता लिन सफल भएको थियो ।
३३औं मिनेटमा रोशन राना मगरले गोल गर्दै खेललाई १–१ गोलको बराबरीमा ल्याए । ४४औं मिनेटमा सायिदजमोल दभ्लातजोनोभले गोल गरेपछि मनाङले पहिलो हाफमा २–१ को अग्रता लिन सफल भयो ।
तर, मनाङले त्यो अग्रतालाई दोस्रो हाफमा बचाउन सकेन । ७१औं मिनेटमा हिजाजीले व्यक्तिगत र टोलीका लागि दोस्रो गोल गर्दै पुलिसलाई हारबाट जोगाए ।
यस बराबरीसँगै मनाङ १६ खेलबाट २० अंक जोडेर सातौं स्थानमा रहेको छ । समान २० अंक भएपनि गोल अन्तरमा हिमालयन शेर्पा क्लब पछि छ । पुलिस १६ खेलबाट १६ अंक जोडेर पुछारमा यथावत छ ।
