काठमाडौं, वैशाख ८ । नेपाली क्रिकेट टोलीका स्पिनर सन्दीप लामिछानेले एसिसी प्रिमियर कपमा आजको खेलमा ओमानविरुद्ध एक विकेट लिएमा ओडिआई क्रिकेट इतिहासमा दुर्लभ कीर्तिमान बनाउनेछन् ।
नेपाल र ओमानबीचको खेल बिहान ९ बजे टियु मैदानमा हुनेछ । सन्दीपले आजको खेलमा एक विकेट लिएमा ओडिआई इतिहासकै सर्वाधिक छिटो एक सय विकेट लिने खेलाडीको कीर्तिमान बनाउनेछन् ।
सन्दीपले ४१ खेलमा ९९ विकेट लिएका छन् । जसमा उत्कृष्ट प्रदर्शन ६–११ छ । सन्दीपले आज एक विकेट लिएमा ४२ खेलमा एक सय विकेट ओडिआईमा पूरा गर्नेछन् । जुन ओडिआई क्रिकेट इतिहासकै सर्वाधिक छिटो एक सय विकेट पूरा गर्ने कीर्तिमान हुनेछ ।
ओडिआईमा सर्वाधिक छिटो एक सय विकेट पूरा गर्ने कीर्तिमान अफगानिस्तानका राशिद खानको नाममा छ । राशिद खानले ४४ खेलमा १ सय विकेट पूरा गरेका थिए । यदि सन्दीपले आजको खेलमा विकेट लिन नसकेपनि उक्त कीर्तिमान तोड्ने सम्भावना कायमै रहेनेछ ।
सन्दीपले अर्को खेलमा उक्त कीर्तिमान तोड्न सक्छन् । सन्दीप आजसहित दुई खेलमा विकेटविहीन बनेमा भने त्यो अवसर गुम्नेछ ।
