काठमाडौं, चैत ६ । प्रधानमन्त्री पुष्पकमल दाहालले सोमबार प्रतिनिधिसभाको बैठकबाट विश्वासको मत लिँदैछन् ।
संघीय संसद् सचिवालयका अनुसार विश्वासको मतका लागि सोमबार दिउँसो १ बजे प्रतिनिधिसभाको बैठक बोलाइएको छ ।
नेकपा एमाले र राष्ट्रिय प्रजातन्त्र पार्टी (राप्रपा) ले सरकारलाई दिएको समर्थन फिर्ता लिएपछि प्रधानमन्त्री दाहालले विश्वासको मत लिनुपर्ने संवैधानिक दायित्व हो । प्रधानमन्त्री दाहाललाई २७५ सदस्यीय संसद्को विश्वास जित्न १३८ मत चाहिन्छ ।
यसअघि प्रतिनिधिसभामा रहेका २७५ सांसदमध्ये दाहालले २६८ मत पाएका थिए । त्यसबेला नेपाली कांग्रेस र नेकपा (एकीकृत समाजवादी) ले पनि दाहालको पक्षमा मत खसाले पनि दुवै दल प्रतिपक्षमा थिए ।
अहिले गठबन्धनको समीकरण फेरिएको छ । संसदमा रहेका प्रमुख दल एमाले र राप्रपा प्रतिपक्षमा गएका छन् भने कांग्रेस सत्तारुढ गठबन्धनमा परेको छ । प्रधानमन्त्री दाहालले आवश्यक मत पाउने निश्चित देखिन्छ ।
शनिबार बालुवाटारमा बसेको सत्तारुढ दलको बैठकले प्रधानमन्त्री दाहाललाई विश्वासको मत दिने निर्णय गरेको हो । सत्तारुढ गठबन्धनमा नेपाली कांग्रेस, नेकपा (माओवादी केन्द्र), नेकपा (एकीकृत समाजवादी), जनता समाजवादी पार्टी (जसपा), लोकतान्त्रिक समाजवादी पार्टी, नागरिक उन्मुक्ति पार्टी, जनमत पार्टी र जनमोर्चा नेपाल लगायतका दल छन् । रवि लामिछाने नेतृत्वको राष्ट्रिय स्वतन्त्र पार्टीले पनि प्रधानमन्त्री दाहालको पक्षमा मतदान गर्ने निर्णय गरेको छ ।
Published Date: 20 March 2023
