विराटनगर, फागुन ३० । विराट गोल्डकप फुटबल प्रतियोगितामा सहभागी हुने सबै टीमको टुंगो लागेको छ । चैत ९ गतेदेखि १७ गतेसम्म विराटनगरको शहिद रंगशालामा आयोजना हुने प्रतियोगितामा गत संस्करणको च्याम्पियन विभागीय क्लब एपीएफ सहित विदेशी टिमको पनि सहभागीता रहने भएको छ ।
विराट गोल्डकपका लागि भारतबाट २ वटा टीम आउने पक्का भएको गोल्डकपका कार्यकारी निर्देशक सुवाशीस कोइरालाले जानकारी दिए । भारतमा जारी आई लिगको दोस्रो डिभिजन खेलिरहेको दिल्ली एफसी र केरलामा रहेको लुका सकर क्लब आउने छन् । यसैगरी नेपालका ३ वटा विभागीय क्लब एपीएफ, त्रिभुवन आर्मी र नेपाल पुलिसका साथै घरेलु टोलीको रुपमा विराटनगर सिटी फुटबल क्लबले सहभागीता जनाउने छ ।
विभागीय क्लब बाहेक ए डिभिजन खेलिरहेका संकटा क्लब र जावलाखेल युथ क्लबले पनि प्रतियोगितामा सहभागिता जनाउने छ । यस सिजन प्रतियोगिताको पुरस्कार राशी पनि बढाउने कार्यकारी निर्देशक कोइरालाले जानकारी दिए । गत संस्करणको उपाधि विजेता एपीएफले नगद १५ लाख १५ हजार रुपैयाँ तथा उपविजेताले ७ लाख ५१ हजार रुपैयाँ प्राप्त गरेको थियो । यस सिजन विजेताले कम्तिमा २० लाख र उप विजेताले १० लाख नगद पुरस्कार पाउने आयोजकले जनाएको छ । यसैगरी प्रत्येक खेलको विजेता टिमले २५ हजार रुपैयाँ प्राप्त गर्ने छन् । यस्तै, उत्कृष्ट प्रशिक्षक, उत्कृष्ट गोलकिपर, उत्कृष्ट मिडफिल्डर, उत्कृष्ट डिफेन्डर, उत्कृष्ट फरवार्ड, सर्वाधिक गोलकर्ता खेलाडी र फेयर प्ले टिमलाई पनि नगद पुरस्कारको व्यवस्था गरिएको छ । खेलहरु रातिको समयमा फल्र्ड लाइटमा सञ्चालन हुने छन् ।
८ टिमले सहभागिता जनाउने प्रतियोगितामा ७ खेलबाट उपाधिको छिनोफानो हुनेछ । अहिले शहिद रंगशाला मर्मतको काम अन्तिम चरणमा पुगेको छ ।
