बैतडी, फागुन २९ । सुदूरपश्चिम प्रदेश सरकारले नेपाली राष्ट्रिय क्रिकेट टोलीलाई यू–१९ विश्वकप क्रिकेटमा पुर्याउन सफल हुने प्रत्येक क्रिकेट खेलाडीलाई जनही एक लाख रुपैयाँ नगद पुरस्कार दिने घोषणा गरेको छ ।
संयुक्त अरब इमिरेट्स (युएई) मा भर्खरै सम्पन्न एसिया क्षेत्रीय छनोट प्रतियोगितामा नेपालले जित हात पार्दै सन् २०२४ मा हुने आईसीसी यू–१९ विश्वकप क्रिकेटमा स्थान पक्का गरेको छ । नेपाली टोलीबाट खेल्ने सबै क्रिकेटरमध्ये पाँच सुदूरपश्चिम प्रदेशका छन् ।
प्रादेशिक सरकारले छनोटमा उनीहरुको प्रयासको कदर गर्दै खेलकुदमा थप उत्कृष्ट हुन प्रोत्साहित गर्ने उद्देश्यले यो घोषणा गरेको हो । ती पाँच क्रिकेटर हुन् दीपक बोहरा, दीपक बोहरा ‘बी’, मिलन बोहरा, हेमन्त धामी र आकाश चन्द ।
प्रदेश सरकारको मन्त्रिपरिषद् बैठकले चारजना (मुख्य प्रशिक्षक, सहायक प्रशिक्षक, व्यवस्थापक र फिजियोथेरापिस्ट) लाई जनही ५० हजार रुपैयाँ पुरस्कृत गर्ने निर्णय गरेको हो । टोलीको मुख्य प्रशिक्षकमा जगत टमाटा, सहायक प्रशिक्षकमा धीरेन्द्र चन्द, व्यवस्थापक विक्रम विष्ट र फिजियोथेरापिस्ट पुरन तिरुवा रहेका छन् ।
नेपाल क्रिकेट संघ (क्यान)का अध्यक्ष चतुरबहादुर चन्दले प्रदेश सरकारले पाँच खेलाडीलाई पुरस्कृत गर्न विशेष पहल गरेका छन् । चन्द आफै सुदूरपश्चिम प्रदेशका हुन् । क्रिकेटर दीपक बोहराले यो घोषणामा खुसी व्यक्त गर्दै नगद पुरस्कारले खेलकुदलाई निरन्तरता दिन हौसला मिल्ने बताए ।
क्यानले अन्य प्रादेशिक सरकारहरूलाई पनि उत्कृष्ठ खेलाडीहरूलाई प्रोत्साहन गर्न र खेलकुद क्षेत्रको प्रवद्र्धन गर्नका लागि पहल गर्न आग्रह गरेको छ। क्यानले छनोट खेल जित्ने टोलीका प्रत्येक सदस्यलाई १ लाख रुपैयाँ पुरस्कार दिने घोषणा गरेको छ ।
