भक्तपुर, असार १४ । भक्तपुर सांगीतिक समाजद्वारा आयोजित सांगीतिक पिकनिक कार्यक्रम शनिबार सूर्यविनायकमा सम्पन्न भएको छ। समाजका आजीवन सदस्य, कलाकार, संगीतकर्मी तथा शुभेच्छुकहरूको उल्लेख्य सहभागितामा कार्यक्रम उत्साहपूर्ण वातावरणमा सम्पन्न भएको हो।
कार्यक्रमको सञ्चालन रामहरी ताम्राकारले गरेका थिए। कार्यक्रममा वरिष्ठ संगीतकार दीपक जंगम, वरिष्ठ गीतकार तथा समाजका सल्लाहकार सुभाषचन्द्र ढुंगेल, प्रतिनिधिसभा सदस्य एवं समाजका आजीवन सदस्य रुकेश रन्जित, निवर्तमान अध्यक्ष प्रविण शाही तथा आजीवन सदस्य एवं संगीतकर्मी सत्यनारायण प्रजापति लगायतको उपस्थिति रहेको थियो।
कार्यक्रममा समाजका अध्यक्ष अल्बर्ट बज्राचार्यले संस्थाको वार्षिक प्रतिवेदन प्रस्तुत गरेका थिए। त्यसक्रममा हालै प्रतिनिधिसभा सदस्यमा निर्वाचित भएका समाजका आजीवन सदस्य रुकेश रन्जितलाई समाजका तर्फबाट बधाई तथा शुभकामना व्यक्त गर्दै बधाईपत्र हस्तान्तरण गरिएको थियो।
त्यसपछि सत्यनारायण प्रजापति, रुकेश रन्जित, सुभाषचन्द्र ढुंगेल र दीपक जंगमले मन्तव्य राख्दै भक्तपुरको सांगीतिक क्षेत्रको संरक्षण, प्रवर्द्धन र कलाकारहरूको हकहितका लागि समाजले निरन्तर सक्रिय भूमिका खेल्नुपर्नेमा जोड दिएका थिए।
कार्यक्रममा लोकप्रिय गायक कुम सागर सहित सहभागी संगीतकर्मीहरूले विभिन्न नेपाली गीतहरूको लाइभ प्रस्तुति दिएका थिए। साथै बिङ्गो तथा अन्य मनोरञ्जनात्मक खेलहरू सञ्चालन गरिएको कार्यक्रमले सहभागीहरूबीच आपसी सद्भाव, भाइचारा र सांगीतिक एकतालाई थप मजबुत बनाएको आयोजकले जनाएको छ। कार्यक्रममा बाल कृष्ण प्रजापतिको ट्रेङ्गल फोटोग्राफी फोटोग्राफी पार्टनरको रूपमा रहेको थियो।
