काठमाडौँ, वैशाख ३१ । नेपालमा हाल पश्चिमी न्यूनचापीय प्रणाली, स्थानीय वायु र तल्लो वायुमण्डलमा विकसित न्यून चापीय क्षेत्रको संयुक्त प्रभाव देखिएको छ। यसका कारण मुलुकभरको मौसममा बदली आउनुका साथै विभिन्न स्थानमा वर्षा र हिमपातको स्थिति रहेको जल तथा मौसम पूर्वानुमान महाशाखाले जनाएको छ।
अहिले कोशी, मधेस, बागमती, गण्डकी र लुम्बिनी प्रदेशका पहाडी तथा हिमाली भू-भागमा सामान्य बदली रहेको छ भने बाँकी स्थानमा आंशिक बदली छ। कोशी र बागमती प्रदेशका केही क्षेत्रसहित लुम्बिनी र गण्डकी प्रदेशका केही स्थानमा अहिले मध्यम वर्षा भइरहेको महाशाखाको भनाइ छ।
आज दिउँसो कोशी, बागमती र गण्डकी प्रदेश लगायतका पहाडी भेगमा मौसम साधारणतया बदली रहनेछ। कोशी प्रदेशका धेरैजसो स्थानसहित बागमती र गण्डकीका पहाडी र हिमाली क्षेत्रमा मेघगर्जन र चट्याङसहित मध्यम वर्षाको सम्भावना छ। यस्तै, मधेस र लुम्बिनी प्रदेशका तराईका केही स्थानमा पनि हल्का वर्षा र उच्च हिमाली भेगमा हिमपातको सम्भावना रहेको छ।
आज राति कोशी, मधेस, बागमती र गण्डकी प्रदेशमा मौसम सामान्यतया बदली नै रहने पूर्वानुमान गरिएको छ। कोशी र मधेस प्रदेशका केही स्थान तथा बागमती, गण्डकी र कर्णाली प्रदेशका हिमाली क्षेत्रका एक-दुई स्थानमा मेघगर्जन र चट्याङसहित वर्षा र हिमपात हुन सक्ने विभागले जनाएको छ।
मौसममा आएको यो परिवर्तन र वर्षाको सम्भावनालाई दृष्टिगत गर्दै आवश्यक सतर्कता अपनाउन महाशाखाले सबैमा अनुरोध गरेको छ।
Published Date: 14 May 2026
